Two wheeler-a ri ring chi vuah tirêm

Aizawl Traffic SP chuan tun hnai khan hriattirna chhuahin, lirthei siamtu company-in a siam dan ni loa mahni duh dan anga lirthei tihdanglam chu MV Act, 1988-in a khap thu leh, two wheeler-a silencer/exhaust pipe ri ring chi vuahte tihrêm tum a nih thu a puang. Danin a phal chin aia ring tichhuak thei silencer hmangte chu Rs 10,000 chawitir theih a nih thu leh, dan leh thupek bawhchhia hriate chu Traffic Control Room-ah hriattir turin mipui a ngen bawk.

Lirthei, a bikin two wheeler-a exhaust pipe ri ring chi vuah a, khawpui chhungah ri ring tak taka an tlan ṭhin hi mi dang tan bengchheng leh ninawm a ni a; zan reh tawhah a bengchheng lehzual a, mi tan phut zawk theihna a ni a, mi tan harsatna thlentu a ni thei.

Bengchheng tak taka two wheeler khalh ṭhinte hian mi tan ninawm leh harsatna an thlen ṭhin a ni tih an inhriat chian a ngai hle; tam tak chuan an hriat sa reng, mahni chauh inngaihtuah vang leh luhlul vanga an tih luih tlatte pawh a ni ang. Mi náwlpui hian an ngaisang lo tlangpui tih an hriat a ṭha a; mi tam takin an sawi zui dan aṭangin mâwl an ti tlangpui tihte pawh hria se a ṭha àwm e.

Sorkara thuneitute leh dan leh thupek kengkawhtute pawhin two wheeler-a ri ring chi vuah chungchangah hian thupek chhuahah ringawt duhtâwk loin, a takin bawhzui ngei se. Tun hma pawhin thupek chhuah a lo ni tawh ṭhin a, mahse, tun thlengin tihrêm a la ni chuang lo; tumna tak tak a awm loh vang a ni mai thei.

Exhaust pipe ri ring chi vuah tihrêm hi tum tak takna a awm phawt chuan thil harsa lo tak a ni ang; thla hnih/khat chhungin an tirêm vek thei hial ang. A chhan chu – thup theih a ni lo a, a ri aṭanga hriat nghal mai theih a ni. A pawimawh ber chu tumna tak tak a ni.