Aizawl tâwt leh lirthei ziah luh zat

Mizoram Transport department chuan April-December 2023 chhungin lirthei 18,660 an ziak lut. Chawhrualin tla tin lirthei 2,070 chuang hret ziah luh ziah ang a ni a, Pathianni leh chawlh ni zawng zawng chhût tel vekin ni tin lirthei 69 chuang hret ziah luh a awm ziah ang a ni bawk.

Thla kua chhunga lirthei ziah luh zinga 13,650 chu two wheeler a ni a, ziah luh zat aṭangin 73.15% niin, a tam fâl hle. Lirthei ziah luhna tam ber chu Aizawl district a ni a, Aizawl traffic hi tâwt lo chi a ni lo.

Lirthei lei thar leh registration tih thar a tam em em hi chhan hrang hrang awm thei zingah Aizawla lirthei intlân chhâwk kalpui hi a chhan lian ber pakhat a nih a rinawm. Mi tam tak, sum leh paia harsa bawk si lote hi chuan lirthei tlân loh nía lirthei ken chhuah theih loh a awm loh nan lirthei pakhat aia tam an neih phah ni ngeiin a lang.

Aizawl khawpui hma lam hun tur thlirin, lirthei intlân chhâwk kalpui zel hi thil ṭha ber a ni em, tih ngaihtuah ngai ve tak a ni. Tuna Aizawla lirthei intlân chhâwk meka lirthei eng emaw zat ni tin (holiday tel loin) a ding chunga lirthei tlân chhuak thei zat hi lirthei intlân chhâwk kalpui hmaa lirthei tlân zat ang kha a tling leh tawh mai thei a, a tam tawh zawk hial mai thei bawk.

Tun dinhmun ngaihtuah chuan, lirthei intlân chhâwktir chhan ber 'traffic jam nasa lutuk tihziaawm' hian awmzia a nei lutuk tawh lo pawh a ni thei a; mahse, kan ti tawh laklawh a, intlân chhâwk tihtawp tawp erawh thil tih chi a ni tawh kher lo ang.

Eng pawh ni se, Aizawl tâwt lutuk tiziaawm tur leh lirthei tlân titlem deuh turin ruahmanna leh hmalakna thar eng emaw tak neih leh ngei a la ngaiin a rinawm a; lirthei leh lirthei chêt vel dan chungchang sorkar thuneite pawhin hma lam hun thui tak thlir chungin an ngaihtuah zel a ṭul âwm e.