Khawpui fai leh bawlhhlawh sâwngbâwl

India rama khawpui fai inelna, Swachh Survekshan 2023 lawmman tun hnaia semah Lunglei chu Clean City in the North East Zone Award (below 1,00,000 population) hlan a ni a, Aizawl chu Clean City Award hlan a ni bawk.

India ram khawpui danga han kal hian mithmuha lang thei maiah chuan Aizawl aia fai a tam lutuk bik lo mai thei a, mahse, khawpui fai intihsiakah erawh chuan Mizorama khawpuite hi dinhmun sang tak a la ni ngai lo thung niin chinchâng hre zawkte chuan an sawi.

Ram pum huapa khawpui faina intihsiakah Mizorama khawpuite a sàn theih loh chhan lian tak pakhat an sawi chu - bawlhhlawh thliar leh sâwngbâwl dan a ni. Hetiang lamah hian Aizawl leh Mizoram hrim hrim kan dinhmun a la hniam a, keini aia ṭha khawpui India ramah a la tam viau niin an sawi.

Hun eng emaw ti aṭang khan Aizawl leh khaw hrang hrangah bawlhhlawh thliar kalpui a ni a, Aizawlah phei chuan ṭawih thei leh ṭawih thei lo paih ní siam a ni. Hei hi hma kan sawn zelna tur, kan inzir zelna tur a ni a, hmasawnna leh changkânna kawng chi khat a ni a, mipui lam hi insiamrem zel theih a ngai.

AMC-in bawlhhlawh thliar tur a tih pawhin mipui zingah zâwm ṭha duh lo an la tam hlein a lang. A paihna/sâwngbâwlna hmunah an thliar leh tak tak chuang lo tih chhuanlama hmangin, mi tam tak chuan an bawlhhlawhte an thliar ṭha duh lo niin a lang bawk.

AMC hian chhan eng emaw avangin a duhthusam angin a sâwngbâwlna hmun lamah bawlhhlawh thiar thei rih lo pawh ni se, mipui lam hian keimahni inzir nan leh tihṭhan (habit) atan pawha ṭha a nih avangin bawlhhlawhte thliar hram hram zel ila, a ṭha ngawt ang.

Sorkara thuneitute lam pawh nasa lehzuala ṭan an lâk a ngai a, mipui rin ngam leh rin tlak ni turin an ṭan a ngai. Bawlhhlawh thliar leh sâwngbâwl hi a nih dan tur ang taka a kal theih nan thuneitute'n hma an lak chak a ṭul a ni.