Lokayukta leh CBI

Mizoram sorkarin Central Bureau of Investigation (CBI) hnenah Mizorama thubuai chhui phalna (general consent) pe tawh mah se, Mizoram Lokayukta chuan sorkar hmasain a koh luhsak duh lohna thubuaite chu CBI chhuitir leh kher an tum rih loh thu Lokayukta Chairman chuan a sawi.

Tarlan danin, Lokayukta hian CBI chhuitir duh thubuai pahnih a lo nei tawh a, mahse, state sorkarin CBI chhuitir phalna a pek loh avangin Lokayukta chuan Anti Corruption Bureau (ACB) hnenah an chhui turin a hlan lêt leh tawh a ni.

Lokayukta case pakhat - sorkarin kum 6 chuang kal ta khan Sakawrhmuituai tlanga skywalk siamna atan cheng nuai 287.25 leh, Durtlang-Chaltlang ropeway siamna atan nuai 1,317 a pe chhuak tawh a, mahse, sum pek tawh zat hman ralna tur khawp hna thawh a awm lo. Sorkar sum cheng vaibelchhe tél awmze nei loa a rîral hi thil pawi tak a ni a; mi tute emaw chuan sum tam tak an hlêp ru ngei niin mipui pawhin an ngai ṭhup a ni.

He thubuai ACB-in an chhui zuina hi eng nge a an dawn hriat a ni lo a, tu'ma mitmei véng lo leh zalên taka tu emaw duhsak bik leh hlauh bik awm loa an chhui beisei ila; mipuiin an lo ngaichâng reng a ni.

Chutih rualin, ACB tana thil harsa a awm palh thei a, an hmalakna duhkhawp lohna a awm thei bawk. Chuvang chuan CBI chhuitir a ṭhat zawkna leh a ṭulna pawh a awm mai thei. Chutiang hunah chuan Lokayukta hian a hmaa a lo beisei tawh tho angin, CBI kuta pek hreh lo se a ṭha hle ang. ACB-in an chhui emaw, CBI-in an chhui emaw, thil dik lo awm ngei nia langah thil nihna tak hmuh chhuah ngei a ngai a ni.