Ram leh hnam humhalh

Central YMA chuan kum hnih, 2023-2025 chhunga YMA kumpuan, 'Ram leh hnam humhalh' tih chu January 16, 2024 (Thawhlehni) zan khan an hawng a, kum hnih chhung hi an kalpui leh a nih chuan kum 16 chhung an kalpuina tur a ni.

YMA hian kumpuan a nei ṭhin a, thupui chi hrang hrang a neih tawh zingah 'Ram leh hnam humhalh' tih hi an hmang ngunin an hmang rei ber lawr lak a nih hmel. Heti taka an hmang rei hi CYMA hruaitute mai bakah, branch hruaitute pawhin a pawimawh an tih êm vang niin a rinawm.

'Ram leh hnam humhalh' tih hian a huam zau thei viau mai. Mizoram leh Mizo hnam himna, leilung leh a chhunga awm chi hrang hrangte hi humhalh a, venhim leh humhim ngai lo a awm lo. Kawng chi hrang hranga inchîmral theihna lakah pawh a him theih nan humhalh ngai a ni.

Tunlaiah phei chuan ruihhloin Mizoram leh Mizo ṭhalaite a rûn mekna lakah hian kan ram leh hnam hi humhalha venhim a ngai lehzualin a lang a, hmalakna hmasa atana hman àwm tak pawh a ni àwm e.

YMA-in kumpuan a bawhzuinaah hian chak takin, fimkhur tak siin kal se. CYMA anga hmalakna a ni emaw, sub-headquarters, group leh branch anga hmalakna a ni emaw, dan chhunga kal a ṭha berin a rinawm. Mihring mihrinna leh nunna, mihring dikna chanvo (human right)-te pawh zah thiam a ṭul; mi reithei leh hnuaihnung bera kan ngaihte pawh hian dikna leh chanvo an nei vek si a.

YMA hi Mizo mipui tel loin a awm thei lo. YMA chu Mizo mipui hi kan ni a, YMA kumpuan pawh Mizo mipui kumpuan a ni kan ti thei ang. Kumpuan tihlawhtling tur hian YMA hruaitute chauh hmalakna a tâwk zo loin a rinawm; mipui hian thinlunga thlàwp mai bakah, mahni theihna zâwnah lo puih a ṭul ngei ang le.