AR sawn chhuah chungchang

Chief minister Lalduhoma chuan Zokhawsanga Assam Rifles hmun January 17, 2024 (Nilaini)-a a tlawhnaah Aizawl khawpui laili aṭanga AR insawn hun tur chungchanga press mi zawhna chhángin, "State sorkarin Zokhawsangah hian tih tur a nei a, chu'ngte chu tih zawh a nih hunah AR insawn chungchang hi ngaihtuah a ni ang," a ti a.

Zokhawsang chungchangah hian sorkar term liam taah khan thu inchuh a awm a; state sorkar hotute lamin Mizoram sorkarin a tih tur a ti zo tawh anga an sawi ṭhin laiin, AR hotute erawh chu state sorkarin a tih turte a la tih zawh loh thu leh an sawi thung. Tun sorkar meka CM pawhin state sorkarin tih tur a la neih thu a sawi ve leh bawk.

Aizawl laili aṭanga Zokhawsanga AR insawn chungchang hi political party ṭhenkhat leh politician ṭhenkhat chuan politics khelh nan an hmang niin an lang a, tun hma aṭang tawhin politician ṭhenkhat chuan thu dik lo mipui hmaah an sawi phah tawh ṭhin. Kum 2023 inthlanpuiah pawh AR insawn chhuahtir hi manifesto-a telh pawh an awm.

Politician ṭhenkhatin thu dik lo mipui hmaa an sawi phah fo tawh avangin AR-te Aizawl laili aṭanga insawn chhuah chungchang hi, political game-ah hman tawh loh ni se a duhawm hle. AR-ho tan ngei pawh a ninawm hlein a rinawm.

Lammual bula AR battalion headquarters hi sawn chhuah kher a ṭha ber em? Aizawl khawpui leh ram mipui tan thil ṭha zawk a ni rêng em, tih pawh hi ngaihtuah tham tak a ni. Sorkar hotute pawhin ngaihtuahna fîm tak leh rilru zau tak nen hma la zui zel se a ṭha hle ang.