Ram hralh chungchanga fimkhur

Land Revenue & Settlement department chuan tun hnai khan hriattirna tichhuakin, Mizoram páwn aṭanga rawn lutte'n Mizoramah ram an lei nasa nia sawi chu Mizoram sorkarin a ngaih thutak thu a tarlang a, The Mizoram (Land Revenue) Act, 2013-in a sawi angin ram hralh chungchangah fimkhur turin mipui a chah.

Revenue department tarlan danin, Mizorama ram nei theite Mizorama chêng nghet, an chhungte January 26, 1950 hma lama Mizorama chêng tawh emaw, India ram President-in Constitution Article 342(1) hnuaia Mizoram state tan bik schedule tribe-a a puante an ni. Sorkarin phalna a pe hmasa a nih loh chuan tribal ni lo hnenah ram hlan phal a ni lo.

Revenue department thuchhuak hi Mizo leh Mizoram mipuite'n kan ngaih pawimawh a ṭul hle. Ram leh hnam humhalh tur leh himna tur hian khua leh tui zawng zawng kan pawimawh vek a, kan ban phâk maiah hian ram leh hnam humhalhna tura kan tih theih a awm vek mai. Mahni hlâwkna leh hamṭhatna tur ringawt thlir lo a, kan ram leh kan hnam himna tur ngaihtuah tel chunga thil tih ṭhin a ngai hle.

Hun eng emaw ti kal ta aṭang khan Mizoram páwn aṭanga Aizawl leh khaw dang ṭhenkhata in leh in hmun (ram) sum tam tak taka lei sawi tur a awm ṭhin. Mizoram chhunga chêng nghet, Aizawl páwn lam mi zingah pawh Aizawla ram lei huai tak tak, a man pawh ngam huai tak tak, ram lei pawp pawp mai an awm thu sawi a awm ṭhin bawk. Chu'ng mite hausak dan chu dan loa chêtna nen a inkungkaih anga sawi a ni fo.

Ram hralh tur neite an fimkhur a ngai a, a lei duhtu chu khawi lam mi nge, Mizoram khua leh tui dik tak a ni em tihte chhui zui ve a ṭha. A ngam huai huai hnena ram leitir zel mai hi kan ram leh hnam tan a pawi thei a, Mizoram himna tiderthâwngtu a ni thei tih hriat a ṭha hle mai.