Mawhphurhna

MNF chuan tun hnaiah press conference koin Food, Civil Supplies & Consumer Affairs (FCSCA) minister chu Mizorama Supply ration card thar dik lo nasa lutukah a mawhphurtu ber a nih thu sawiin, báng turin an phût tih a sawi. MNF chuan minister hi ration card-a tih dik loh tam tak awmah mawh la ngam loa mawhpuh tur zawng kualah an puh.

Politics-ah hi chuan an khingpuite tlin tawk lohna hi an zawngin an fel lohna an sawi chhuak ṭhin a, tun hnaia MNF lamin ration card dik lo awma minister an puhna pawh hi thil tihâwm tak a ni. Sorkar-ah hian thil dik lo leh thil pawi lian tham a awmin mawhphurtu ni chiah lo mah se hotu lamin mawhphurhna laa ngaihdam an dil changte a awm a, thil thlen dan azirin banna an thehluh hialte a awm ṭhin.

Tun hnaia ration card-a thil dik lo awmah hi chuan a mawhphurtu hi an awm lo emaw tih mai tur a ni a, thuneitu lamin a chhan an sawifiah tak tak chuan a tawpah computer lam leh a la khawmtu lam thiam loh a ang ta lek lek mai. Computer (software) lamin form in fill up dan dik lo a hmu dik thei lo tih hi chu tlang hriat a ni a; nimahsela a dik lo chunga computer-a barh luitu lam mihring hi an awm ngei tur a ni a, hengte tal hi chu zep leh thup tum tur chi niin a lang lo.

Thil fel lo a awm a ni tih an hre chhuak har lutuk leh, ration card tam taka thil dik lo hmu chhuak miah loa an chhuttir thlap maite hian thawktute inthlahdahna a awm tih chiang takin a tarlang a, heng thilah hian mawhphurtu chu an awm ngei tur a ni.

'Ration card-a thil inziak dik lo mai mai' tia namnul theih ni bawk mah se, hetiang hi sorkar lama tute emaw inthlahdah avanga thleng a nih vangin sawi mam mai chi a ni lo a, heng thil thlenga mawhphurtu pawh awm lo anga tlip tum hi chu a fuh lo. Engpawhnise hotu leh hruaitu chuan mawhphurhna an la ngam tur a ni a, minister a ni emaw, a hnuaia officer leh staff-te pawh ni se, tu emaw chuan, 'Kan tih dik loh a ni e,' an tih ngam a, puh tur zawng loa kalpui hi a finthlak zawk awm e.