Corruption donaa hnungtawlh loh

Chief minister Lalduhoma chuan January 20, 2024-a press conference a neihah, corruption an donaah dodâlna nasa mah se, an tawlh dawn loh thu te, eirûkna leh hlemhlêtna do tura an tlai ṭêp tawh zawk thu te, inthlanah tlâk phah dawn pawh ni se corruption donnaah hnungtawlh an tum loh thute a sawi.

Mizoramah hian corruption-in zung a kaih thûk tawh hlea sawi te, remchang a awm chuan hlemhlêtnaa inrawlh hreh lo te, thil dik lo pawh pawmzam zel mai duh an tam thute sawi a awm ṭhin. Heng hi mi zawng zawngah dik vek lo mah se, mi tam takah chuan a dik pawhin a rinawm.

Eirûkna leh hlemhlêtna do tak tak tur hian a lû ber a pawimawh ber a, a dawta a hnuaia mite; a kal thla zel a, mipui náwlpui pawhin pawimawhna kan nei vek.

Sorkar hian corruption a do tak tak dawn a nih chuan mipui pawh kan inrin ve a ngai. Kan chhungte emaw, ṭhian hnaivaite emaw eirûknaa fihlim lo an awm mai thei. Thil dik lo titute ṭan tlattu leh vuipuitu, corruption dotute huat phahtu kan nih loh nan mipui hian rilru leh ngaihtuahna dik kan neih a ngai.

Chief Minister-in thil dik leh ṭha an tih vang leh corruption an do avangin inthlanah tlâk phah dawn pawh ni se eirûkna leh hlemhlêtna donaah hnungtawlh an tum loh thu a sawi hi a lawmawm em em a, a thlamuanthlak. Sawi ringawtah tàwp loin, hlen chhuak ngei turin ṭan la sauh sauh se. Mipui pawhin sorkar thâ tichak turin theihtawpin lo thlâwp ve ila, mipuiin an thlàwp phawt chuan an huaisen zual phah bakah, an chak lehzual phah ngei a rinawm a ni.