Buaipuiawm Mizoram power pekna

Kuminah ruah a tla ṭan a, Mizoram hmun hrang hrangah power supply a khaihlak leh ṭan nghal a; power pek chhuahna hmunpuite chei ṭhat a nih vangin power supply a awm lo a, hmun ṭhenkhatah power pekna lam a chhiat avangin power an pe chhuak thei lo bawk.

Mizoramah hian kum tin mai fur a lo thlenin power pek chhuahna hi a buai ziah mai a, a chhan chhui chhuah a ṭha ngawt mai. Fur pui a thleng a, ruah leh thli avanga thirban a tluk chang a awm a, thing tluin power pekna hrui a tihchhiat chang a awm a, hengte hi chu hriatthiam theih a ni a; nimahsela ruah a tlak hleka power supply a buai fo hi chuan chhan a nei tur a ni.

A hre deuhte sawi danin kan power pek chhuahna hmunpuia kan hmanraw neihte hi a hlui tawhin a ṭha tawk lo a, transformer tam tak hi a chhiat tawh bakah a hunlai pawha a ṭha ber chi a ni lo hlawm a, thirban kan phun dante thleng hian a nih tur ang a ni phak lo a, ruah a sur hi chuan harsatna a awm ngei
ṭhin niin an sawi.

Transformer leh power dang bungraw hman mekte hi a quality thlengin a ṭha tawk lo niin an sawi a, a hunlaia a supply-tu, a leitute leh hmantlak a ni tia pawmtute hian tun hnaia ruah tlak apianga power supply khaihlakah hian mawh an phur em?

Power supply tel loin kan khawsa thei lo a ni ber tawh a, engkim mai hi kawlphetha chakna hmangin kan thlun zawm deuh vek tawh. Hetiang khawvela kan chen tawh avangin power supply khaihlak hian mi tam tak nun a tibuai a, an nitin khawsaknaah harsatna a thlen a, a buaithlak hle a ni.

Engpawhnise kan dinhmun tawn mekah hian mipui lam tan lungawi a harsa a, hnathawktute thawkrim hle mah se a hmanrua ber mai hian duhthu a sam lo a, chu chu kan tuar tlang niin a lang a; sorkar hian power supply pekna bungruate hi a tharin a thlak thei dawn em?