Covid-19 dona kai rual se

Mizoramah Covid-19 dona chak taka kalpui zel a ni a, sorkarin mitin zawm turin inkaihhruaina (Standard Operating Procedure) a duang a, chumi zawm lote chu khawpuiah chuan pawisa chawitir ṭhin an ni. Sorkarin SOP zawm ṭha leh ṭha lo vil turin mi a ruat a, hmun hrang hrangah kal kualin dan zawm ṭha lote an vai ṭhin. 

Hetihlai hian sor­kar buatsaih pui­punna ṭhenkhatah sorkarin pun khawm a phalsak zat aia tam pungkhawm hmuh tur an awm fo hi a ṭha lo hle mai a, sorkar berin ama thupek chhuah a zawm lo tihna a ni bawk. Chu mai chu ni loin kan sorkar hotu lu (VIP) chinin mipui hma leh sorkar function-ah hmaituamna (mask) vuah loa inlan an ching viau bawk a, hei pawh hi dan phal loh a ni. 

Mipui mimir chu khawlai leh vantlang hmuna mask vuah lo an hmuhin sorkar mi rawihte'n pawisa an chawitir ṭhin a, mirethei leh harsa tak takin an hriat loh avang te, mask vuah reng an nin avangte leh a ṭhen te phei chu an theihnghilh palh avangin pawisa an chawi tawh. Khawpuiah phei chuan sumdawngte hi an zuam bik emaw tih mai turin an dawr chhungah luh chilhin mask vuah leh vuah lo an vai a, dawr nghaktute pawh an dawr chhunga mask vuah loh avanga pawisa chawitir an nei hial a ni. 

Sorkarin heti taka khauha a kalpui chhan chu Covid-19 a darh zel lohna tur leh he hripui laka kan fihlim tlan theihna tura tih a ni a, hetih­laia kan sorkar mi pawimawhte mask vuah loa media lama kan lo hmu fo mai hi a pawi a, dan palzutna a nih piah lamah mipui zah lohna a kai thei. Mirethei harsa zawkte mask vuah lo pawisa chawitir an nih lai a, kan VIP-te mask vuah loa punkhawmnaa an awm fo hian mipui mit a tikham. 

Covid-19 kan donaah hian dan angin mirethei ber leh mi thiltithei ber pawh ṭang tlang ila, thiltithei deuh dinhmuna din avanga Covid-19 dona tura duan SOP hi bawhchhhiat ni tawh suh se.