Zangnadawmna dawng, in ṭhiat duh lote

Mizoram hmun hrang hrangah National Highway kawngpuite zauh a ni a, siam mek a ni hlawm. Kawngpui zauhna turin mimal ram eng emaw zat lâk a ni a, khaw eng emaw zatah chuan NH kawngpui kama mimal inte pawh ṭhiah a ngai.

Ram lâk a ni emaw, mimal in ṭhiah a ni emaw, a neitute hnenah zangnadawmna pek tura tih vek a ni a, a tam zawk chu pek an ni tawh. Khaw ṭhenkhatah chuan kawngpui kama in neite chuan an in ṭhiatin, kawngpui aṭangin an tawlh hla hret a, mi ṭhenkhat chuan hmun dangah in thar an sa bawk.

Kawngpui kama in nei, kawngpui zauhna tura in ṭhiah ngai zinga a tam zawkin in an ṭhiah tawh laiin, khaw ṭhenkhatah zangnadawmna la vek tawh sia tun thlenga in ṭhiat duh lo an la awm. Tun hnaiah Serchhip district-a khaw pakhatah chuan in ṭhiat duh lo ṭhenkhat chu sorkar thuneitute'n khawl hmangin an ṭhiah luihsak a, khaw ṭhenkhatah chuan sorkar hotute'n hun tiam siamin, in la ṭhiat lote chu ṭhiat turin an vau mek bawk.

Zangnadawmna a kim biaia dawng tawh chung sia in ṭhiat duh tlat lote hi ram hmasawnna tikhawmuangtute an ni a, mi dang tana tawrhna thlentu an ni. In an ṭhiah loh avangin kawngpui siam zawh theih a ni lo a, chu chu ram mipuiin an tuar a, an awmna khaw mipui phei chuan an hriselna thlengin a tuar theiin a rinawm.

Chuvangin, zangnadawmna la vek tawh, in ṭhiat tura tih zawng zawng chu a rang thei ang berin insaseng se a duhawm hle. Dan leh sorkar thupek zâwm lo an nih fur tawh avangin sorkar thuneitute pawh khawng takin dan angin kal se a ṭha hle ang.