Uluk zawka sikul vil

Kum 2016-2017 atan sikul kai ṭan a ni leh ta a, School Education department, MBSE, SCERT leh DIET-a hotu hrang hrangte chu insem darihin sorkar sikulte an tlawh kual. School Education Minister pawhin sikul a tlawhnaah thusawiin sikulte uluk zawka vil an tum thu a sawi.

Mizorama sorkar sikulte hi tun hma chuan uluk taka vil ṭhin an ni a, tun hnaiah hian sikul a pung a, hnathawktu lam indaih loh vangte pawh a ni ang, sikul vil hna hi sorkar hian a thawk chak tawk lo. Vil ngai loh leh thuneitute tlawh pawh loh sikul ṭhenkhat chu an inthlahdah a, zirnain a tuar a, sikul hmunhma tihfai leh vawn fel thlengin an hlamchhiah a, a tawpa a tuartu ber chu zirlaite an ni ṭhin.

Tun hmain Mizoramah private sikul a la awm meuh lo a, hetih hunlai hian Mizo zirlai ṭhahnemngai leh thiam thei deuhte chuan hna ṭha tak tak an chelh phak a, UPSC-ah hian inziak tlingin mi hlawhtling tak an ni thei. Tun hnaiah hi chuan sorkar sikula lut tan zirnaah hlawhtlin a harsa ta ang hiala ngaihna lian tak a awm a, thingtlang kilkhawr thlengin private sikul a ding a, nei leh nei loin mipuiin an bawh a, a zia lo hle a ni.

Mizorama sorkar sikula zirtirtu ṭhenkhatte hi chu kum lamah pawh upa tawh, thiamna lamah pawh sang vak lote chu an awm ngei ang a; nimahsela zirtirtu nawlpui hi chu English pawh thiam, zirna ṭha taka kalpui thei tura thiamna nei an ni. Heng mite hian theihtawpin hna thawk ngat se, sorkar sikul aia private sikul-a hlawh tlem zawkte zirtirna hmun hi a ṭhat zawkna tur awmin a lang lo.

Mizoram sorkar hian a sikulte hi tun aia ngun zawkin vil se, a hmunah kal chilhin an hnathawh dan leh an harsatnate pawh enpui se, uluk zawka sikul vil hian zirnaah rah ṭha a chhuah ngeiin a rinawm.