Airport himna ngaih pawimawh

January 23, 2024 (Thawhlehni) chawhma dar 10:25 velah Myanmar thlawh-theihna pakhat chu Lengpui Airport-ah a chesual a, a pawi hle mai a; chutih rualin, mitthi leh hliam na lutuk an awm lo a, a vanneihthlak tel bawk.

Lengpui Airport-ah hian May 4, 2011 khan thlawhtheihna tereuhtê, mi pakua chuan theihna NE Shuttle (Cessna) pawh a lo chesual tawh a, ṭumkawngah ding zo loin a tlân liam a, thi leh hliam an awm lo.

January 23, 2024-a chetsualna thleng leh hi Lengpui Airport chanchina khualzin phur thlawhtheihna chetsual ṭum hnihna niin a lang. Thlawhtheihna chesual hrim hrim hi a pawi a, chutih rualin, mitthi an awm lo ve ve erawh a lawmawm.

Lengpui Airport-a thlawhna ṭum hnih chesual tawhte hi Airport hrim hrim leh a ṭumkawng ṭhat tâwk loh vang a ni kher lo mai thei. Chuti chung chuan, thlawhnaa himna pawimawhzia te, chumi tur chuan airport changkâng leh him ṭha tak neih a ṭulziate min hriat thartirtu ni thei se a duhawm hle.

Kum thum vel kal ta aṭang khan tun thlengin Lengpui Airport terminal leh a chhehvel chei ṭhat a ni a, mahse, chei ṭhat a nih danin duhthu a sâm lo hle niin a lang. Chei ṭhat a nih laia chimte a awm a, chumi hnu lamah leh tun thleng pawhin a nih dan tur ang ni loa thil siam leh, siam tura tih siam tel lohte pawh a awm nia sawi a ni.

Mizorama airport awmchhun Lengpui Airport hi mite rin ngam leh rin tlak a nih zel theih nan te, airport ṭha leh changtlung tak a nih theih nante uluk taka enkawl a ṭul tak zet. Airport him a nih theih nan thil fel lo awm thei apiangte enfiah zung zung a, ṭha tâwk lo apiang siamṭhat nghal zel theih ni se, a ṭha ngawt ang.