Dan loa kuhva tawlhrûk chungchang

Gauhati High Court Aizawl Bench chuan, ram dang kuhva dan loa tawlhrûk chungchanga December 29, 2021-a Champhai Police Station-a FIR thehluhah thubuai ziah luh a nih loh chhan sawifiah turin a hriattir a; kuhva rah tawlhrûk chungchang chu chhui ṭha leh turin sorkar a hriattir bawk.

January 22, 2024-a Gauhati High Court thuchhuaka a lan danin, dan loa ram dang kuhva rah tawlhrûk chungchangah mi pakhat chuan, December 29, 2021 khan Champhai Police Station-ah FIR a thehlut a, mahse, police-te'n case an ziak lut duh lo. Chuvang chuan High Court-in FIR ziah luh a nih loh chhan sawifiah turin a hriattir ta a; kuhva tawlhrûk chu chhui ṭha leh turin state sorkar a hriattir bakah, CBI pawh chhuitir theih a nih thu thlengin a tarlang a ni.

Hun kal tawhah police ṭhenkhatin case register duh loh bik an nei hi a pawi hle mai a, mi ṭhenkhatin hlâwkna eng emaw an neih duh vang pawh a ni mai thei; mahse, police pum pui hmêl tibâltu a ni zawk.

Dan loa kuhva tawlhrûk chungchangah sorkar leh sorkar hnathawk ṭhenkhatin dan loin thil an ti ṭhin a, Mizoram Police mi leh sa ṭhenkhatte chêt dan nia sawite hi a dik a nih chuan a zahthlak a, kan rama thleng ni lo atan a duhawm hle.

Ram dang kuhva dan loa Mizorama tawlhrûk hi tunah chuan sorkarin a do na hle rih niin a lang a, sorkar hian thâ thlah loin ṭang sauh sauh se, hlawhtling ngei turin bei zui zel se. Sorkar mai bakah, mipui pawhin thil dik lo kan do ngam a ngai a; kuhva tawlhrûk do hlawhtling tur pawhin mipui hian sorkar hmalaknate kan thlàwp ṭhat a ṭul ngei ang.