Ramri buai chingfel tura hmalak

Mizoram sorkarin Mizoram ramri buai chinfel dan ngaihtuah tura a din thar, Mizoram State Boundary Committee January 25, 2024-a ṭhutkhawmah chairman - Home Minister chuan, ramria buaina a chhuah chánga Mizoram ramri buai chinfel dan ngaihtuah leh ṭhin ai chuan, buaina a awm loh laia chinfel dan zawn an duh thu te, ṭhenawm state-te nena lungrual tlàn theihna tur zawn a pawimawh thute a sawi.

State ramri buai, a bikin Mizoram leh Assam ramri buai chinfel tumin sorkarna chelhtu hmasate pawhin hma an lo la tawh ṭhin a, sorkar term hmasaa Boundary Committee pawhin thui tak hma an lo la tawh a, state pahnihte chu minister level-ah ṭum thum lai an inbe hman nghe nghe.

Sorkar hmasain hma a lo lâk tawhte kha thil ṭha, bawhzui tlak tak tak a nih a rinawm a, tuna State Boundary Committee thar pawh hian bawhzui chhunzawm zel se a ṭha àwm e. Hun hmasaa hma an la lak lohnaah hma thar lakna turte pawh a awm theiin a rinawm.

Mizoram ramri buai chingfel tur hian ngaihtuahna fím tak hman a ngai a, Mizoram hlâwkna tur duh lutuk vanga thil àwm vak lo thlenga ṭan khawh chiam pawh thil awm thei a ni; fimkhur a ngai hle ang.

Home Minister sawi angin, state pahnih inhriatthiam tawnna leh lungrual tlânna lo chuan ramri buai hi chinfel theih a ni kher lo ang; chuvangin, Mizoram leh Assam hian hmun ṭhenkhatah hloh ṭhen an neih laiin, hmun dang ṭhenkhatah hlêp pawh an neih ve ve a ngai thei a, chutiang záwnga inrem-siam a la ṭulin a rinawm.

Heng zawng zawng hi sorkar hotute leh Boundary Committee hotute mai bakah, pawl hrang hrang leh mipui hian kan hriatthiam a ṭul ang.