Mizoram State Health Care Scheme

Health minister Lalrinpuii chuan Mizoram State Health Care Scheme (MSHCS) an duang thar a, an peih hnaih thu te, April 2024 aṭangin MSHCS thar hman theih tawh an tum thu te, bill theih chin natna tihdanglam a nih dawn thute a sawi.

Mizoram sorkar tharin MSHCS an duan thar chu eng ang tak nge tih hriat mai theih a la ni lo a, mipui náwlpui tan a hma aiin a ṭha zawk dawn nge, a ṭha lo zawk dawn tih pawh hriat a la ni lo. A ṭha zawk tura ngaia an tih a nih a rinawm a, chuvangin, a hma aiin a ṭha zawk turah beisei phawt mai ila.

Kum 2008-a kalpui ṭan Mizoram health care scheme hi tunah chuan political ball a ni deuh roh a, political party ṭhenkhatin kalpui ṭha bikah an inngai a, party dangin an kalpui ṭha loah an ngai bawk. Politics-a inbeihnaa an hmang hi thil àwm tak a nihna lai a awm ve bawk ang - sorkar chak leh chak loh hriltu a nih ve theih avangin.

MSHCS hi tuna kalpui mek anga kalpui zel emaw, kalphung thar duan emaw pawh ni se, thil ṭha, mipui, a bikin sorkar hnathawk awm lohna chhungkuate tana ṭha tak leh lawmawm tak a ni hrim hrim a. A pawimawh ber zawk chu – mipuiin harsatna an tawh lohna tura tluang taka kalpui leh, a rang thei ang bera bill pek chhuah a ni.

Kum eng emaw ti kal ta aṭang khan MSHCS-ah hian bill inhnawhkhawm, bill táng a tam em em. Sorkarin medical bill a pek loh, sum a batsak pawh cheng nuai 70,000 vel laite a tling a, tunah pawh cheng nuai 50,000 chuang a la ba mek nia sawi a ni.

MSHCS hnuaia sorkarin mipui sum a batsak hi vawi leh khatah pek chhuah nghal duak theih a nih loh hmel a, Mizoram sorkar hian sum a nei thut dawn lo tih mipuiin kan hriatpui ve a ṭha. Chutih rualin, sorkarin a ngai pawimawh a, chinfel tuma ṭan a la tak tak a nih chuan tuna kal dan aia rang zawk hian damdawia inenkawlna senso mipuiin an hmuh theih ngei a rinawm.