Ramri vên uluk lehzual

Central Young Lai Association hruaitute leh 20th Assam Rifles hotute tun hnaia inkâwm chuan, Mizoram chhim lama India (Mizoram) leh Myanmar ramria venhimna chungchanga thawhho dan tur an sawiho a; uluk lehzuala ramri vèn an rêl a, Mizoram hi ruihhlo tawlhrûkna kalkawng a nih avangin ramria lut leh chhuakte uluk lehzuala endik ṭhin an rêl a ni.

CYLA leh Assam Rifles-te thil sawiho leh hmalakna tura an rêlte hi thil pawimawh tak mai a ni a; Mizoram leh Mizo hnam kal zelah himna leh rálmuanna atan thil ṭha tak a nih a rinawm.

Myanmar lamah Zo hnahthlak mi tam tak an awm a, India leh Myanmar inrìna aṭanga km. 16 huam chinah phalna hranpa lâk ngai loa zalên taka inkalpawh theih a nih bawk avangin India-Myanmar ramrite hi a zalên em em a, mipui pawh duh duhin an inkalpawh thei a ni.

Zalên taka inkalpawh theih a nihna hi thil sual ti ṭhinte leh ruihhlo tawlh ṭhinte tan pawh kawng a inhawn zauh phahna a ni a, misual tlanbo duhte tan pawh relhrûkna kawng tiawlsamtu a ni bawk.

Zalên taka inkalpawh theih a nih karah hian venhimna lamah fimkhur leh uluk a ngai hle. India leh Myanmar ramri vengtu Assam Rifles pawhin uluk zawkin ramri vêng se, chumi avang chuan ramri kâna mihring che vêl endik a ngaih cháng pawh a awm thei. Chutianga an lo ti a nih pawhin Mizoram mipui hian kan hriatthiam ve a ngai ang.

Ramri vêngtute hian a páwng a takin Mizo mipui hi min haw ngawt lo a, thil dik lo tih tum lo tan an hnawksak lêm lo niin a lang a, Mizote ṭhian ṭha nih an tum em em reng zawk. Kan ram leh mipui himna atan ramri vengtute hi Mizo mipui leh pawlte hian a remchan anga kan thawhpui thiam a ṭul hle awm e.