Mizorama RTI Act kalpui dan

Mizoram chief information commissioner John Neihlaia chuan, miin sorkar department-a an hriat duhte RTI Act tlawhchhana an zawhah, SPIO chhan dana lungawi lote zualkona hmasa, Department Appellate Authority (DAA)-a an zualkoin DAA-te'n an tih tur an ti lo deuh tih statistics-ah a lan thu leh, an hnena zualkote harsatna DAA-te'n an lo chinfelsak ṭha lo deuh nia a lan thu a sawi.

RTI Act hi thil tha tak mai a ni a, sorkar thil tih vel dan chi hrang hrang, thu thup deuh thlenga kan hriat theihna a ni a, sorkar khalh ngilna hmanraw tha tak a ni.

Chutih laiin, information diltute'n SPIO chhan dana an lungawi lohna an thlenna tur leh an harsatna lo chinfelsaktu tur DAA-te'n an tih tur an ti tawk loa a lan thu CIC-in a sawi ta mai hi a zialo hle mai a; thil hriat nuam lo tak a ni. DAA-a awm department officer zawng zawng hian an tih tur an hriat chian lehzual a, an hnena zualkote an theihpatawpa lo pui turin rilru siam thar se a duhawm hle.

SPIO-te pawh an nihnaah an chian lehzual a ngai. SPIO thenkhat chu fel tak tak, dawr nuam tak tak, an tih tur chinah a tha thei ang bera thil ti zel an awm a, thenkhat erawh chu zawhna zâwttu an chhannaah an namnûl mah mahte niin a lang ve bawk. SPIO zingah thil a nihna taka chhang duh lo, thup then neite pawh an lo awm tawh thin a, Mizoram Information Commission lamin thu an pek avanga a dik taka chhan leh thei tho site pawh an lo awm tawh a ni. Hetiang thil hi awm tawh lo hle a tha hle ang.

SPIO thenkhatin a nihna taka chhang lo a, thup then an neih chhan thenkhat chu an chunga thuneitute leh sorkarna chelhtute'n thup tura an tih vang pawh a ni thei a. Chutiang chi-ah pawh chuan sorkarna fawng vuantute lam pawh an insûm a, an inrawlh loh a tha hle ang. RTI Act tlawhchhana zawhna eng pawh thup then nei loa dik taka chháng ngam sorkar kan mamawh a, chutiang ni thei tur chuan sorkar pawh kal ngei se kan ram leh hnam tan a tha hle ngei ang le.