A hmun loa meizuk

Mizoram State Anti-Tobacco Squad chuan sorkar kum (financial year) liam ta, 2022-23 chhung khan Mizoramah phal lohna hmuna mei zu mi 261 an man.

District hrang hranga anti-tobacco squad-te chuan phal lohna hmunah mei zu an awm leh awm loh hi an endik ṭhin a, nikum chhunga phal lohna hmuna mei zu an man zat hi mi 261 an ni. Danin a phal lohna hmuna mei zute hi pawisa chawitir ṭhin niin, an pawisa tlingkhawm hi Rs. 20,790 a ni.

Mimal hmunhma ṭhenkhat leh sawrkar hmunhma tam zawkte chu mei zuk phal lohna hmun a ni a, heng hmunah te hian phal a nih loh thu chu thuziak leh a lem hmanga tih lan a ni deuh zel a, hriatthiam harsa tur niin a lang lo – han hawi zau zeuh chuan hriat theih mai tur a ni deuh zel.

Mahse, tun hnaia Mizoram State Anti-Tobacco Squad thu leh hla aṭanga chhut chuan, dan zawm lo mi ṭhahnem tak an la awm tihna a ni, hre reng chunga tisual an nih loh vek pawhin hmangchang hriat loh vang leh fimkhur tawk loh vanga dan bawhchhia an ni ngei ang.

Tun laiah chuan mi kan changkang tawh a, mimal zalenna leh duhthlanna kan ngaipawimawh tlang tawh hle. Mei zumite pawh dem ngawt theih an ni lo a, anmahni duhthlanna ngeia zu an nih avangin an zalenna pawh a ni, kan inkhap a remchang kher lo mai thei – phalna hmuna zuk phei chu mi dang tana sawisel ngawt pawh a remchang bik lo.

Chutihrualin, a hun leh hmun hriatthiam a pawimawh a. A bik takin puipunna hmuna mei zu hmuh tur an la awm ṭhin hi a pawi, keimahni chauh inngaihtuah theih a ni lo a, kan chheh vela mite kan ngaihtuah tel a ngai, hrem nih hlauh vang ni loin mi dang tana harsatna thlen theitu nih duh loh avanga insum hun hriat a pawimawh hle. Ho téa kan ngaih leh mahni indah pawimawhna kha mi dang tana harsatna thlen theitu a ni tih kan hriatthiam a pawimawh hle.

Anti-tobacco squad hi Mizorama district hrang hrangah din a ni tawh. District thar pathum – Saitual, Khawzawl leh Hnahthial tih lohah chuan din a ni vek. District bawrhsapte chu chairman niin, sorkar department hrang hrang aṭangin member an ruat ṭhin a ni.

Sorkar hnathawk sate rin mai ṭhin an nih avangin Anti-tobacco squad hi din a harsa loin a rinawm a, chuvangin Mizoram chhung district dangte ang bawkin district tharah te pawh a rang lamin awm ve se la, rah ṭha a chhuah ngei a rinawm.