Zirtirtu lak fimkhur a ngai

Education minister Dr Vanlalthlana'n SSA hnuaiah zirtirtu lak a nih dawn thu a sawi a, hna lak tur hi dik leh felfai taka tih a nih tur thu a sawi bawk – a thusawi hi a taka a chantir thei a nih ngat chuan lungawi lo tam tak an awm mai thei. Chutihrualin a tam zawk an lungawi ang – Mizoramin kan ṭhatpui ngei bawk ang.

Mizoram sawrkar hmasaah khan, thawkkhat lai khan zirtirtu lak an ni a, hna lak a tam tham em avang khan party mi leh sa tam tak chuan chan ve an beisei a, sawrkar hna thawh theihna remchang niah an ngai pawh a ni mai thei. Mahse, an beisei ang hna an hmuh tak loh avanga lungawi lo an tam a, chu chuan party chhungah thawm ṭha lo a chhuah tih kan la hre thei ang – mipui lamin khatih laia education minister kha an fak a, a party mi leh saten an sawisel thung. A hnua zirtirtu lak leh, a bikin SEDP Teacher lakah chuan party mi leh sate duh dan angin hna lak a ni ta zawk a, a nghawng chu sawi nawn ngai loin mipui lamin kan hre vek.

Sorkar thar a lo piang a, hna lak langsar leh tam tham hmasa chu zirtirtu a ni leh dawn. Education minister hian hna lak tur chungchang hi ngun takin a zir chiang tawh ngei ang a, a kalphung pawh a tidanglam hret réng a ni. Zirtirtute pawimawhna leh mawhphurhna hre reng chungin hna hi lak ni se la, lehkha mai bakah naupang nunphung thlenga chhertu an nih avangin fimkhur leh thianghlim takin hna hi lak ni se a duhawm hle.

Zirtirtu ṭha lak an nih chuan hun rei lo te chhungin sorkar sikul siamṭhatna kawng kan zawh dawn tihna a ni a, hemiin a nghawng tur chu mi rethei leh khawsak harsa zawkte an ni ang. Kan sorkar hrawn lai hian mipui banphak sorkar din an duh a, an tum takzet a nih chuan zirna in siam ṭhat hi a kailawn hnai leh pawimawh hmasa chu a ni.