Inbuatsaih làwk a ngai

January 2, Zirtawpni khan Mizoram hmun ṭhenkhatah ruahtui a tla a, Aizawl khawpui leh a chhehvelah pawh hun rei vak lo chhung chu ruah a sur. Ruah sur ruala lo lang nghal ziah chu tuihàwk a ni a, kum dang ang bawkin ruah sur hmasain a rawn hrin chhuah tuihawk chu a bawlhhlawhin hmuh a nuam lo hle a, heng tuihawkte hi mihringten kan hman ṭangkai tak luia luang lut leh tur an ni a, luia cheng sangha leh lui lam sate tan chuan ànchhia a ni ngei ang.

AMC-in sum tam tak sengin, hun eng emawti chhung chu Aizawl khawpui chhungah bawlhhlawh an khawn tawh. Sum leh pai, tha leh hrui tam tak a luanral tawh hnuah kan khawpui a la fai hleithei lo hi a pawi a, thuneitu lam bakah mipuiten kan tih tur kan tih tawk loh vang pawh a ni thei ang. Mahni ṭheuh fai hmasa ila, kan chhevel kan tihfai miau chuan khawpui fai kan nei thei dawn a ni.

Kum tin hian khél loin nipui, thlasik, fur leh favang a lo thleng ziah. Kuminah pawh heng hunpui inthlak hi kan tawng chho leh ngei ngei dawn a, harsatna leh buaina ṭhenkhat hi kan dan theih loh leh khuarel chhiatna awm mah se, ṭhenkhat erawh kan fimkhur loh leh nun dan ṭha loin a nghawng avanga lo thlengte a ni thung, heng lakah hian engti angin nge kan inven ang tih hi ngaihtuah a ngai.

Rei vak lo hnuah ṭhal a ni leh dawn a, tui a tlemin kan duhkhawp kan hmu lo leh ngei ang. Sorkar pawhin tui pump dan tur ṭha leh a khawlte a enfel lawk hmasak a pawimawh a, tui vàn vanglai taka khawl chhia vanga buaina a thlen loh nan; tun aṭanga lo inhmakhua lawk a ngai - mipui pawhin tui renchem nachang kan hriat a pawimawh hle bawk.

Ṭhal hnuah ruahsurin min chiahpiah leh ngei dawn bawk, a bikin khawpui chhunga lei lai leh in sa mekten ruahtui tlak tam hmain a theih anga invenna leh fimkhurna lam an kalpui a pawimawh a, kan thunun leh inven theih chin china hmalak nachang kan hria a nih chuan nunna, tha leh hrui bakah sum tak tak kan senna te kan tiziaawm thei ngei ang.