A huna hna thawh zawh

Engkim tan hun ruat a ni tih ang deuh khan, thil siam leh hnathawh nan pawh hun ruat a ni ṭhin a, a chinfel theih hun bi tuk a ni ṭhin bawk - a huna hna thawh zawh a nih loh chuan kawng hrang hrangin nghawng a nei bawk ṭhin.

Tun hnai khan Chief Minsiter Lalduhoma chuan, sorkar thar hnuaiah chuan hmasawnna hna thawh hrang hrangte chu a huna zawh tum tur a nih thu a sawi, a thusawi anga a huna hna zawh theih a nih ngat chuan rahbi thar pawimawh tak a ni ngei ang.

Mizoramah tun hma aṭanga hmasawnna hna thawh a ni ṭhin a, a huna hna thawh zawh tam tak awm mah se a huna thawh zawh loh tam tak a awm ve bawk. Inthlahdah vanga hna thawh zawh hman loh, sum hman ennawn ngaih phah te pawh a awm hial, heng hian a ṭha lam aiin a ṭha lo zawngin nghawng a nei ṭhin tih chu mipui te hriatsa vek a ni.

Sorkar thar hnuaiah pawh hmasawnna hna hrang hrang tawh a ni leh dawn, ṭhenkhat chu thawh mek a ni bawk. A zavaiin a hunah an zo fel ṭhap vek thei lo a nih pawhin a tam zawk chu a hunah zo thei hram se, hei hian mipuite tan rah ṭha a chhuah ang. Kan chhawr theih tur a huna kan chhawr theih chat chat zel chuan sum leh pai bakah tha leh zung kal ral tur a ti reh ang.

Mipuiin kan thlan ang ngeiin sorkar thar kan nei a, an phurin an zam pawh a ṭha rih vut vut hle. An fimkhur erawh an ngai dawn, an thu sawi leh thil tihte hi mipuiin kan lo chhinchhiah zel a, an sawi anga an awm lo emaw, an thawk ṭha tawk lo emaw a nih chuan anmahni na tak vaw let theitu a ni dawn, chuvangin Pathian rawn chungin dik leh rinawm takin, fimkhur tak bawkin kal se a duhawm hle a ni.