A hmun loa in sak

Aizawl Municipal Corporation (AMC) chuan tun hnai khan in sak phal lohna hmun (Protected Area)-a in sa lui mi pakhat chu a in sak ṭhiat turin a hriattir a, hei bakah hian dan zawm loa in sa leh lei lai nia hriat te chungah pawh hma a lâk mek thu an tarlang bawk.

AMC thu chhuah tarlan dan chuan, in sak phal lohna hmuna in sak hi sawifiah tura tih a lo ni tawh a, a insawifiahna hi pawm a ni lo. Tuna in sak ṭhiat tura an tihna thu hi a khauh hle, a hun chhunga a ṭhiat duh lo a nih chuan ṭhiahsak leh a man pawh chawitir a nih theih thu thlengin an sawi.

Bawngkawn leh Durtlang inkar kawng chho, khâm chung thengthaw nuam tak hi in sak phal lohna hmun a ni. Khâm pang a ni a, lei ṭhil a tamin lung lum leh lei tawlh awm theihna hmun a nih bakah, khaw hawi nawmna leh boruak thiang nuam tak awmna hmun a ni thung.

Ram changkangah chuan in sak phal lohna hmun hi a awm ṭhin, heng hmunte hi in sak a rem loh leh him lohna hmun a nih bakah, khawpui boruak tithianghlim a tinuam theitu tur ram awmna te a nih vang a ni ṭhin tlangpui.

Aizawl khawpui dai velah pawh in sak phal lohna hmun a awm a, hengte hi nakin hun zel ngaihtuahin vawn him ṭhat a pawimawh hle. Mi pakhatin a ti lui a nih chuan midang pawhin AMC hi an nek zui ngam zel dawn tihna a ni, chu chuan rah ṭha lo a chhuah ngei ang. Nek ngam leh nek turin AMC hi a lo awm reng tawh zawk pawh a ni thei bawk.

Thuneitu lam hian Mizoram ṭhatna tur ber nia an hriat angin hma la se la, tun hmain tih fuh loh deuh an lo nei tawh a nih pawhin inenfiah nan hmang se la, thu an chhuah leh hma an laknaah hian nghet takin ding ngam se la a duhawm hle.

Zuam bik leh nek ngam bik neiin AMC hian ro a rel a nih erawh chuan mipuiin an dem dawn, an thil tih hi mipuiin an thlir reng. Chuvangin, tihsual emaw tih fuh loh a awm tawh a nih pawhin a tlai lutuk hmain siam ṭha leh se la, dik takin rorel ngam rawh se.