Kangmei vèn uluk

Tun kar kan hman lai hi 'Kangmei Vèn Hapta 2024' a ni a. Thawhṭanni khan Mizoram district hrang hrangah a bul ṭanna hman niin, Aizawlah chuan chief minister Lalduhoma hoin hman a ni a, thil pawimawh tak a nih avangin state puma hman hi a ṭul reng a ni.

Aizawla hun hmanah hian Chief Minister chuan kan pi leh puten kangmei an ven dan, lo atana an vah bak chu uluk taka an ven ṭhin dan leh an fimkhur thu uar takin a sawi a, hei hi tunlai miten kan entawn tur pawimawh tak a ni. CM thusawia lang tel pakhat chu, ṭhangthar zawkten ram kan tikang nasa a tih kha a ni, tikang tawh lo tura inven a ngai tak zet.

Mizote hi kan pi leh pute aṭanga lo nei mi kan ni a, eizawnna peng hrang hrang chu awm ve bawk mah se mipui tam zawk hian lo an neih a la ngai. Agriculture lama kan mi thiamten tlangram lo neih thlakna ṭha zawk an la kalpui thei lo a, sokar lam pawhin a thlakna ṭha a la neih miau loh avangin hun eng emaw ti chhung chu kum tin lo kan neih a la ngai dawn tihna a ni.

Mipui lamin mawhphurhna lian tak kan nei, kan lo neih tur bak ram kàng hi a zau ṭhin. Hei hi a tlem thei ang bera sàwi zim a ngai a, chumi tur chuan sorkar thuneitu lamin lo hal hun leh dan zawm tur a tih te theih ang tawka kan zawm a pawimawh a, khua leh tui ṭha nihna a nih bakah kan nakin hun siamtu a nih avangin kan zavaia mawh phurhna a ni.

Sorkar lam pawhin fire department lam thuam chak zual se, kang ṭhelh pawl awm lohna khua hi a tam zawk a la ni ngei ang, heng hmunah te hian tlawmngaia kàng ṭhelh a ni ṭhin. Thuneitu lam pawhin office tual zawl aṭanga kangmei ven ngawt duhtawk loin, a taka che chhuaktu puih dan ngaihtuah ni se, tha leh zunga an pui thei lo a nih pawhin sum leh pai hmanga puih dan nasa zawk awm thei se a duhawm hle.