Hotel leh restaurant en uluk a ṭha

Mizoramah hotel leh restaurant a awm ve ta nual a, hengho hi khawpui chhungah leh khaw kar kawngah pawh an inzam nasa tawh hle. Heng hotel leh restaurant-te hi an eitur siam a thianghlim tawk em tih endik fo a ṭha khawp mai.

Khawpui chhung bikah restaurant-te hian an bungbel silfai nan tui an nei ṭha tawk em? An bungbel an tlengfai ṭha tawk em tih te, an thilsiam tih han nan Ajinomoto te an telh nasa lutuk em? Hrisel nana pawi thei thil dang an telh ṭhin em? tihte hi a endik tura ngaihten uluk zawkin an endik turah ngai ila; an viltu department-a thawktute pawhin ṭhahnemngai takin endik ṭhin se a lawmawm ngawt ang.

Hotel-te pawh hi an thil siam leh a man a inphu em tihte hi chik zawka endik fo a ṭul khawp mai. An room man leh a ṭhat dan en fo a ṭha. Hotel neituten an duh zat zat room man an chhiar angte hi control a ngai hle. An eitur siamte pawh a tui dan te, a tam dante enfiah a; a man nen a inphu em tih thlengin endiktute hian endik ṭhin se a lawmawm khawp ang.

Hotel-ah emaw, restaurant-ah emaw hmuh theih si loin eitur an siam a, a tuihnai em tih te, an sa siam pawh a thianghlim tawk em tih pawh en fo a ṭha. Sa leh eitur tuihnai lo, thianghlim tak anga lang min lo chhawp fo thei a, customer-te'n min chhawp ang ang kan ei mai ṭhin vangin a endiktute hian endik uar deuh se a lawmawm ngawt ang.

Restaurant ṭhenkhat changkang deuha duan si, an eitur chuti teh lua ni si lo, a man to ve em em ringawtte pawh a awm nual mai. Chungte chu mimal anga sawisel mai a harsat vangin report-na (complaint-na) hi a concern department hian siam se a ṭha hle. A man inphu deuh hian restaurant leh hotel neitute hian siam hram teh se.