Dikna chanvo

Internet khawvelah kan cheng tawh a, thil engkim mai hi a danglam chho mek zel – hmanraw changkang leh ṭha kan neih hian khawsak min tih awlsam phahna tam tak a nei, chutih lai mek chuan harsatna tam tak min thlen ve thei bawk.

Tun hnai khan Mizoram police-te chuan, facebook lama mahni inthup chunga dawt hmanga mi dang puhtu mi pakhat chu an man. A hming thup mah se internet khawvelah chuan harsa vak loa chhui chhuah theih mai a ni tih a takin a lang, hmaikawr vuah mah se police ten tu nge a nih an hre thei tih chiang takin kan hmu a ni.

Smart phone kan hûm deuh vek tawh, a pawimawh lai chu keimahni kan smart tel ve a ngai a ni. Internet khawvel a nih tak avang a, mahni hming leh hmel thup chunga ṭawngkam mawi lo leh thu dik tawk lo pawh duh tawk tawka sawi a, tlangaupui chiam chiam mai hi a ṭha lo – India dan pui kalhna a ni a, khua leh tui ṭha chuan hetiang thil hi a ti ve tur a ni lo.

Mi tinin dikna chanvo kan nei a, he dikna chanvo hi mi dang nekchep nan leh mi pawi sawina tura tih a ni lo – kan dikna chanvo ang chiah kha keimahni ang bawka India khua leh tui chuan a nei ve tho, chuvangin kan fimkhur tlan a pawimawh hle.

Internet khawvel a nih tawh avangin thuthar thehdarh chungchangah pawh kan fimkhur tlan a ngai, a thehdarh hmasa leh puang hnem nih ringawt hian lawmman dawn tur an nei chuang lo a, a tidarh hmasa leh nasa nih ngawt aiin a hre dik leh tidiktu nih kan tum tlan zawk a ngai a, chu chu khua leh tui ṭha kan nih theihna kawng awlsam a ni.

Mi tin hian dan leh hrai kan hre vek thei lo, kan chhiarin kan hrethiam vek thei dawn lo bawk. Hei erawh kan hre thei vek ang – Miin kan chunga an tiha kan duh tur ang chin hi mi dang chungah ti ve ila, dan kan bawhchhe loin khawsak ho pawh a nuam ngei ang.