Mipui ban phak Sorkar

South Tuipui Bialtu MLA Jeje Lalpekhlua chuan inthlan dawna a lo intiam tawh ang ngeiin, a bial chhunga damlohna avanga Zoram Medical College (ZMC) pan ngaite tan in a luah tur thu a sawi, hei hi a taka a tihlawhtling a nih chuan thingtlang lam aṭanga ZMC pantu tan chuan a ṭangkai hle ang.

Hun rei tak chhung state kan ni tawh a, hmasawnna hna kairual lo avangin thingtlang leh khawpui dinhmun a inthlau hle tih chu ni tin kan hmu. Khawpui mi tan chuan thingtlang nun hi hmuhnawm leh ennawm a tling hial emaw ni tih tur a ni a, hetiang chiah hian thingtlang mi tan khawpui nun a danglam ve bawk.

MLA tam tak kan nei tawh, ṭhenkhat chu inthlan dawna inphahhniam thei tak ni mah se, an tlin hnua thuneihna an chan meuh chuan mipui ban phak loh khawpa sangin an awm leh mai ṭhin, hetiang mite hi an daih rei ngai lo - tuna kan MLA neih mekte pawhin hei hi hria se a ṭha hle.

Mipui hian sorkar lak aṭanga kan beisei leh duh hi a inchen lo fur ang, a pawimawh hmasa nia lang chu mi harsa zawkten an ban phak leh an tluk luh theihna tur hi niin a lang. ZMC bula in luah pawh hi thil ropui leh langsar tak a ni kher lo mai thei, mahse mi harsa zawkte tana MLA banphak a nihna lantirna a ni a, hetiang ti theitu chuan mi harsate tan kawng dang pawh a dap thiam zel ngei ang tih pawh a rin theih.

A pawimawh ta ber mai chu, kan sorkar hrawn lai hian sorkar hmasa lama kan hmu tawh ṭhin; hmasawnna kairual lo lutuk ang kha kalpui ve lo se, Mizoram mipui huap zo leh a ram pum anga kan chhawr theih thil tur ngaihtuah thiam se la, hmasawnna hi a hausasate hausak belh nan chauh ni lo, a mamawh zawkte khaichhuahna ni zawk thei se, a duhawm hle.