Sorkar hnathawk sawn

Kalphung hlui kalsan tumin mipuiin kalphung thar min zawrhtu party kan thlang lal a. Kalphung ṭhenkhat chu thlak a ni ngei dawn a, ṭhenkhat erawh thlak rem lem lo, dan leh hrai anga kalpui ngai tam tak a awm ve bawk.

Tun hnai khan health minister Lalrinpuii chuan sorkar hnathawk ten awm hmun nghet an neih loh thu a sawi a, mipui rawngbawl an nih avangin an awmna hmun apiangah lungawi taka hna thawk mai turin a chah a ni.

Minister hian thu dik awm sa, zawm mai theih tur a sawi. He thu hi soarkar hnathawk ten hre nawn thar leh ṭhin se la a pawimawh hle. Dan kan neih lai angin sorkar hnathawk hi sawn an la ni fo dawn a, chu chu eng sorkar pawh hrawn ila kan hmachhawn ngei ngei tur a ni.

A pawimawh lai chu, sorkar hnathawk chu eng vanga sawn nge an nih a, an aiawh tur dah nghal zel an ni em tih te, an awm chen tur an awm em tih te leh chhan leh vang mumal tak a nei reng em tih te chu chhut uluk a ngai hle.

Kalphung hluiah khan thuneitu hmelhriat ṭha neih vanga mahni awm duhna hmun an awm tlat tih te, Aizawl khawpui aṭanga sawn chhuah theih loha awm nghet tih te, thingtlanga awm ve thei lo sorkar hnathawk tih thawmte a awm fo, hei hi mipuiin kan ngaitheih loh lai chu a ni.

Sorkar thar hi chuan kawng hrang hranga duhsak bik an neih loh tur thu an sawi ṭhin, hei hi sorkar hnathawk a siksawi dan phungah pawh hian lantir thei se, hmehriat ṭha leh party mi leh sa duhsak zawng tih lan nan hmang loin, Mizoramin a mamawh dan leh ṭhatpui theih dan tur ang berin sorkar hnathawk sawn leh siksawi hi kalpui theih ni se a duhawm hle.

Mipui lam pawhin tih tur kan nei, thuneitu lam kan hmelhriat ṭha a nih pawhin mahni nawmsak nan hman tum lo ila, mahni huat leh ngaihtheih loh zawng hêk leh sawn tum tlat ang te hi kan kalsan ngam a pawimawh.