A huna kawng siam

PWD minister Vanlalhlana chuan tun hnai hian Mizoram chhung kawngpui hrang hranga hnathawh mekte a endik kual nasa hle, a bik takin ei leh bar lakluhna pui ber Vairengte leh Sairang inkar kawngte a en a, hna thawh mek leh hmabak tam tak a awm.

Minister hian kawngpui te hi a ṭha tawk lo tih a pawm a, fur ruahtui a tlak nasat hmain siamṭhat ngei a ngai tih a sawi. A department chan PWD bakah NHIDCL te chuan minister thusawi hi an hre ngai ang a, a taka an chantir ngei pawh a beisei awm hle a ni.

Tun hma aṭang tawhin Mizoramah inkalpawhna kawng a ṭha tawk lo a, ei leh bar lakluhna kawng pawimawh ber pawh hi a ṭha hleithei meuh lo, sorkar kan hrawn tawhte pawhin kawng siamṭhat hi an harsat a, kum tin mai hian buaipui ngai leh inchirhtheihna lian tak hi a tling ṭhin.

Sorkar thar kan hrawn chho mek a, a changtu minister hian tun hma lama harsatna lo thleng tawh ṭhin hi a hrechiang tih a rin theih a, chumi pumpelh a nih theih nan leh harsatna sutkian tumin chak takin hma a la mek tih kan hre bawk.

Lirthei lian chi kalna kawngpui a nih avangin a siam a hautakin a harsa ang tih a chiang a, chutihrualin state dangah pawh Mizoram anga lirthei lian an tlan tho a, an ngah zawk hial bawk - kawng an siamṭha thei a nih chuan keini pawhin kan theih ve ngei a rinawm.

Ṭhal khawro lai kan hmang chho mek a, tun hi kawngpui siamna atana hun ṭha chu a ni. Mizoram sorkar pawhin hei hi hria se la, nakin lawkah chuan ruah sur vangin hnathawh a harsa leh dawn, chuvangin thir chu a lin laia den a ngai - a hunah tak sorkar a che a nih chuan sum leh pai, tha leh zung luangral tur tam tak a luanral loh phah thei ngeiin a rinawm.