Hna thawh chhunzawm

Aizawl By Pass laihna tur pawisa chu sorkar laipui lamin an rawn pe chhuak ta a, titi a titam zui nghal hle. Sorkar laiin an bawhzui tur a ni dawn a, sorkar hmasa chuan thangṭhat hlawh tumin theihtawp an lo chhuah ve bawk.

Kan sorkar hrawn hmasak khan Mizoram hmasawnna tur kawng hrang hrangin an ngaihtuah a, hna pawh an thawk ṭeuh. Tuna Aizawl By Pass laihna tur chungchang pawh kan Chief Minister hmasa khan a thu chuan an lo sawi fo tawh a ni.

Sorkar a inthlak a, hun hmasa lama sum lo chhuak hman lo kha a rawn chhuak. MNF party chuan an hun laia an hnathawh rawn lang chhuak ta a ni tih an sawi a, tu mah in tih a ni lo e an va ti pawh a ni hran lo - chuhpuitu an awm thawm hriat a ni hran lo.

Tun hma aṭangin hmasawnna lian leh ropui tak tak ni thei tur a lo kal fo a, sum pawh tam tham leh hna thawh zawh theihna tur khawp a lo kal fo tawh. Ṭhenkhat chu mimalin an hausakpui a, an hnathawh ṭha lo chu mipuiin kan tuar fo tih pawh kan hriat hnu vek a ni.

Hmasawnna hna thawh tur hi a sawi chhuah a pawimawh a, chumi aia pawimawh zawk chu hna thawh ṭhat a ni. Mizoram ro tling tur kan tihkhawloh a awm ta fo. Tun ṭuma sum tam tak hman tur awm pawh hi a sawi chhuaktu leh sawi hawngtu nih inchuh ai chuan, ṭha taka hman a ni em? tih hi a pawimawh zawk - mipui pawhin hei hi kan tehna a nih ngei a rinawm.

Kan sorkar hrawn mek hian sorkar hmasa lama hma an lo lak tawh, chhunzawm tlak leh ro tling tur hi chu a ṭha thei ang berin chhunzawm zel hreh lo se la. Eptu lam pawhin a thu hmanga lo beih nghal chiam ai chuan, hna an thawk ṭha tawk em tih kha ngun takin lo enpui ve reng se la, an thawk ṭha lo a nih vaih chuan a khalh ngil turin na takin khak ngam se, mipui pawhin kan ngaisang zawk ngei ang.