Nungcha humhalh

Thlasik khaw vawt a zo a, tunah chuan nipui a thaw dawn ṭan - nungcha inthlah pun hun kan hmachhawn chho leh dawn, a bik takin chungleng sava te inthlahpun hun a inṭan chho leh mek tihna a ni.

Tun ang hun chhoah hia chuan chungleng savte hi inthlahpung rual chu mahni maia awm loin, siahthing zarah di chhai an rel a, run hmun lendun an rel hunlai a ni a, an tana hun pawimawh a nih avanga duata dim an mamawh tak zet.

Tun hnai khan Environment, Forest and Cliamte Change (EFCC) hnuaia Seling Forest Range leh Ṭawi Wildlife Sanctuary hnathawkte chuan, sava leh thehlei tam tham tak kaphlumtu an man a, tan inah khung an ni hial.

Mihringte hian kan mamawh leh ei leh in tur chuan khawvela thil awmte hi kan eiin ka la thei ngei mai, chutihrualin ṭhenkhat hi chuan kuthlei thil tih leh nawmchen nana nungcha suat pawi ti miah lo hi a awm ve theih bawk.

Silai ṭha leh man to pui pui nei, mahni nawmsak leh kuthlei vang chauha nungcha kap ṭhin an awm a nih chuan a ṭha lo hle. Hei hi dan pawhin a phal loh thil a ni a, tun hnaia thil sual titute aṭang hian mi dangin zirlai zir chhuak ngei se a duhawm hle.

Nungcha chauh an ni lo, ran vulhte thlenga zahngaihna nei miah lo pawh an awm thei bawk ang. Khawlaia ui leh ranvulh dang chhuakte hi a fuh tihna a ni chuang lo a, a mawi loin dan pawhin a phal bik lo, a neitu lamin enkawla khuahkhirh hi kan tih tur a ni bawk.

A pawimawh ber chu, khawvel hi mihringte tan chauha siam a ni bik lo - thing leh mau, nungchang leh ramsate nena kan chenhona tura siam a ni. Chuvangin, inhrethiam tawn taka awmho tur kan ni a, mihringte hi a enkawltu tur kan ni, kan enkawl turte hi nghaisa loa kan ngaihsak zawk an ngai.