Bru-te an duhna hmunah

Mizoram aṭanga anmahni duh thu ngeia Tripura-a pem, tuna Tripura refugee camp-a awm mek Bru-te chu Tripura-a an awm hlenna turin Ministry of Home Affairs (MHA), Mizoram sorkar, Tripura sorkar leh Mizoram Bru Displaced People Forum (MBDPF) te chuan tun hnai khan New Delhi-ah inremna (agreement) an ziak. 

Kum 1997 leh 2009 khan Bru-te hi a hlawmin Tripura-ah an pem a, Tripura-a an awm hnu hian Mizorama an chen lai aiin Mizote tan an hnawksak zui mah niin a lang. Tripura-a pem satliah ni se Mizoram tana hnawksak thei pawh an nih loh laiin an vote an pempui a, Tripura-a awm siin Mizoram inthlanah vote an nei. Tripura aṭanga vote an thlak theih avang hian political party lamin an tlawn rawn a, anni lam lahin 'vote bank' an nih inhriain thiam takin an lo khawsa ve bawk a, hun rei tak chhung chu Mizoram inthlanah harsatna an thlen tiin a sawi theih ang. 

Bru-te hi hruai kir tuma vawi tam hmalâk a nih hnuah a hlawhtling hleithei lo a, tunah Tripura-a an chen hlen theih dan ruahmanna siama an inrem thei ta hi a lawmawm takzet a ni. 

Vawi tam hamṭhatna dawng tura koh kir tum pawha kir duh lo Bru-te hi an awm duhna hmun takah an awm hlen dawn ta niin a lang.