Thisen pek uar ang

Association for Voluntary Blood Donation (AVBD) leh a thawhpui hrang hrangte ṭangkawp chuan February l4, Nilaini khan Mizoram hmun hrang hrangah thisen pek runpui a buatsaih a, Mizo ṭhalai tam takin thisen an pe.

Hun eng emaw ti lai aṭang khan kum tin hian Valentine's Day pual hian thisen pek runpui buatsaih a ni ṭhin a, an la chhunzawm zel pawhin a rinawm a, chhunzawm tlak ni pawhin a lang - a ṭha lam zawnga ṭhalaite chet chhuahna pakhat a ni.

Damlo kan tam a, thisen mamawh tam tak an awm. A mamawhtute tan chuan thisen hlutna hi a sang em em a, mangang leh rilru hrehawm taka awm laia thisen hi pek ṭhin a nih avangin a dawngtu tan chuan a hlu zual ngei bawk ang.

Mizo ṭhalaite kan changkang zel a, chu changkanna chuan thisen pek pawh hi a rawn ti alh thar zel ni pawhin a lang. Mi ṭhenkhat chuan thisen hi an pe nasa, vawi 50 chuang lai pe tawhte pawh an awm, heng mite hi an entawn tlakin an chhuanawm hle. Mi dang tana an luanchhuahna leh inpekna hi a thamral dawn lo a, zirtirtu ṭha an nih bakah nun chhanhimtu an ni.

Hmanlai laiin sa leh rál hmaah chhan ngai kan awm tawh rih lo a ni mai thei, tunlaiah chuan hrisel lohna leh damlohna avanga thisen mamawh chhan ngai an tam thung. Ṭanpui ngaite kan ṭanpui theihna hnai, nun kan chhan theihna kailawn pawimawh tak chu thisen pek hi a ni - mihring hrisel ṭha pangngai tan chuan thisen pek hi a hlauhawm loh a, a uiawm lo bawk - mi thiamten an sawi dan chuan pek chhuah hi a hrisel zawk ni tein an sawi hial. Chuvangin mi dang tana malsawmna ni turin thisen pek i uar zel ang u.