Ruihhlo do

Mizoram sorkar tharin a buaipui langsar tak zinga mi chu ruihhlo hi a ni. A buaipui tur department Excise & narcotics department (END) leh a changtu minister hian mutmawh hnarmawhah an nei tih a chiang, tha thlah loin an bei mek a ni.

END hian tlawmngai pawl lian, hma la chak leh member ngah YMA chu thawhpuiah a sawm chat a, hei hi a tih tur dik tak ni pawhin a lang. Tun hnai khan CYMA leh END hotute an inhmu a, ṭhalai tam tak suattu ruihhlo do dan tur leh hmalak chhunzawm dan turte an ngaihtuah.

Sorkarin ruihhlo do a ngaipawimawh hi a lawmawm a, Mizo ṭhalai; a bik takin tlangvalte thihna thlen nasatu a nih avangin nasa taka do hi a tih makmawh pawh a ni. Sorkarin thapui a thawh chung hian a khat tawkin ruihhlo man thu hi hriat tur a la awm reng tho a, tih rèm vek chu a harsa dawn ni pawhin a lang.

END minister hian ṭhalai thihna nasat dan a zirchiang a, kohhran ṭhalai report en hian hmeichhia aiin mipa an thi nasa hle tih chiang takin a lang a, hei hi member tam zawk an nih vang chu thuhran ni se, ruihhlo chu a chhan lian tak a ni tih a chiang hle.

Mizoram sorkar hian ruihhlo leh thil tawlhruk hi langsar takin a do mek a, hei hian ram ṭha a chhuah ngei a rinawm. A vaiin an tirèm vek thei lo a nih pawhin, a zualpui leh tam zawk hi chu an tih rèm ngei beisei ila, a hunlaiin sawisel leh dem kai lek leka an chet a ngaih chang a awm a nih pawhin, mipuii lamin kan hriatthiam a ngai a, sual tipunluntu ni loa a nek cheptu kan nih zawk a pawimawh - kan ṭangrual a nih phawt chuan dan hmangin sual tam tak hi kan hneh thei ngei ang.

Mizo mipui tam zawk hian ruihhlo do kawngah chuan sorkar hi kan thlawp a, chuvangin sorkar pawh a dinna ngaiah nghet takin ding se, chak lehzual zawkin hma la sauh sauh se a duhawm hle a ni.