Mizoram State Day lawm

Vawiin February 20 hi Mizoram state a nih champha, Mizoram State Day vawi 38-na a ni a, Mizoram sorkar huaihawtin lawm a ni dawn a, sorkar hotute leh officer-te tel tura beisei an ni. Sorkar bultum thoin Lammual leh district dangahte mipui ṭawngṭai rualna hun buatsaih a ni dawn bawk.

Mizoram state a nihna tur hian Parliament-ah August 5, 1986 khan dan (bill) pawm a ni a. Dan anga thil tih ngaite tihfel a nih hnuah February 20, 1987 khan khatih laia prime minister Rajiv Gandhi chuan Lammual, Aizawlah Mizoram state a nihna chu a rawn puang ta a ni.

MNF-in kum 1966-ah Mizoram independence puangin, India lak aṭanga zalen tumin an bei a, mahse, a tira an tum tak chu thleng zo loin, Mizoram chu state a ni ta zawk a. Hemi chungchangah hian tute emaw dem zui chiam an awm ṭhin a, mahse, thil ṭul ber a ni lo ang. Tuna kan nihna, kan dinhmun hi kan pawm thiam zel a ṭha.

Kan ram hruaitu, political party hrang hranga mite hian eng tikah emaw Mizote hi rorelna pakhat hnuaia awm an beisei deuh vek a, mipui hriatah an sawi ṭhin. Beiseina leh duhthusam a ni a, a thleng dawn em hriat a ni lo a, thleng pawh ni se, engtika thleng tur nge hriat a ni lo. A thleng miah lo ve thei bawk.

Chuvangin, ram dinhmun leh rorelnaah tuna Mizoram nih theih sang ber chu state a nihna hi a ni a. State nih hi kan duhthusam emaw, kan duh ber emaw a ni lo a nih pawhin, a hlu hrim hrim a, kan nih theih sang ber a nih rih miau avangin Mizoram mipui hian kan hlut thiam a ṭha hle. Kan duhthusam angin hma sawn chiah lo mah ila, state kan nih avangin hmasawnna tam tak kan neih phah ve a ni.

Sorkarin State Day lawm a tum hi a lawmawm a, kum lo la kal leh zel turah pawh chawlh (holiday)-a puan ringawtah duhtâwk mai loin, hlut zual zel hi kan tih âwm tak a ni ngei ang. Sorkar hotute leh sorkar hnathawkte chauh telna tur ni lo, mipui nâwlpui tel theihna tur thilte pawh ngaihtuah chhuak thar zel ila a ṭha hle ang.