Dik tak leh rinawm taka thawh

MPSC-in MCS Combined Competitive Examination 2023 a buatsaiha tlingte lawmpuina leh chawimawina ZONET-in February 16, 2024 zana an buatsaih a. Tlingte aiawha thu sawitu, exam-a pakhatna Lalnunpuia Renthlei chuan, tling tharte chu an hnaah Kristian an nihna keng lut tur te, dik tak leh rinawm taka thawk turtein a chah a, "Kan hna hi mipui rawngbawlna a ni sathliah lo a, Pathian rawngbawlna a ni. Kan thiamna leh finnate Pathian tan, kan ram leh hnam tan i hmang ang u. Pathian tel lo finna hi chu kan mawipui aiin, kan mâwlpui zawk thin," a ti.

MCS Combined Competitive Examination 2023-a pakhatna thusawi hi amah leh a tlinpuite fuihna a ni a, a ropui hle. Anmahni mai bakah, sorkar hnathawk zawng zawngte tan pawha pawimawh a ni. Hetiang tak hi officer tling tharte leh sorkar hnathawk mekte pawh ni thei se a duhawm hle mai a, mipuiin kan beisei dan pawh a ni.

Officer tharte leh sorkar hnathawkte hi sorkar neitu tak tak an ni a, sorkar that leh that loh leh ram hmasawn leh hmasawn loh chungchangah an pawimawh tak zet. Mipui, chincháng hre lo tak takte tan pawha dàwr nuam, sorkar tana chhenfâkawm, ram leh hnam tana hmasawnna thlentu nih tum tlat, a tha zawnga hming chher tum tlat mi ni vek thei se a duhawm hle.

Officer-te hi an pawimawh em em mai a, an kutah thil tih theihna eng eng awm a la awm ngei dawn a; thil dik lo huaisen taka hmachhawn ngam nih a tul hun a la awm fo ang. Hotu lu zawkte leh sorkar hotute atangin thil dik lo ti tura nawrna pawh an la tawng mai thei. Chung hun a awm a nih pawhin huaisen takin hnial ngam se. Eirûkna leh hlemhlêtnaa fihlîm, rinawm vang leh dikna tan vanga tuar ngam, ram leh hnam hmangaihna tak tak nena thawk thin officer leh sorkar hnathawk neih zel hi mipuiin an beisei em em a ni.