Sorkar chak leh mawhphurhna la ngam

Mizoram Governor chuan February 19, 2024-a budget session ṭan nía thu a sawiah, "Ka sorkar chuan inrêlbâwlna chhawng hrang hrangah sorkar chak, langtlang leh rinawm, harsatnate su kiang tura rang taka hma la ṭhin leh, mawhphurhna la ngam sorkar nih tlat kan tum," a ti a.

Larsap Dr Hari Babu Kambhambati thu sawi hi a pawimawh hle mai a, a sorkar, Mizoram sorkar hi a sawi ang tak ni thei se, ram nuam tak a ni ngei ang.

Sorkar chak chuan mipui ni tin khawsakna mamawh hrang hrangte hnianghnâr takin mipui tan a chhawp ṭhin a; hei hi mipuiin sorkar an beisei dan pawh a ni fo. Hemi kawngah hian Mizoram sorkar hi harsatna a awm loh nan ṭang mar pât reng se.

Sorkar chak chuan ram hmasawnna turin hna nasa takin a thawk ṭhin. Mizoram hi kawng hrang hrangah hmasawnna tur, hmalakna tur leh hna thawh tur a la tam hle. Sorkarna chelh mektute hi inpek thûk zawk nen Mizoram hmasawnna tur kawng an zawn char char a, an thawh sauh sauh a ngai a ni.

Ram chhungah thil eng emaw a thlenin, a ṭul anga mawhphurhna la ngam sorkar kan mamawh – a bik takin buaina leh harsatna a thlen chângin. Hun kal tawhah sorkar inrawlhna âwm taka sorkar a ngawih veng veng leh, inrawlh duh miah lohna thil a lo thleng tawh ṭhin a, chu chuan mipui nâwlpui tan harsatna a thlen ṭhin a ni. Governor-in a sawi angin, Mizoram sorkar hi harsatnate su kiang tura rang taka hma la ṭhin leh mawhphurhna la ngam ni ngei teh se.