Ramri hung leh Free Movement Regime

Sorkar laipuiin India leh Myanmar ramri hung a tum leh Free Movement Regime (FMR) a ṭhiah an duh loh avangin, NGO Coordination Committee chuan February 21, 2024 khan Aizawlah dodalna an lantir. An Chairman chuan, "Kan inkalpawh theih loh nana ramri min hungsak tumtu central sorkar kan dem a, an thil tih tum hi kan dodal zel dawn," a ti.

India leh Myanmar ram inkara FMR hnuaiah hian ram pahniha mite chu phalna hranpa lak ngai loin, boruaka km. 16 chhungah zalen taka an luh leh chhuah phal a ni a, hun rei tak kalpui a ni tawh.

Hmânlai aṭang tawhin Mizote hi tuna Myanmar leh India ram kan kàr tawn nasa. Mizorama pianga seilian zingah Myanmar-a péma inbêngbel ta tam tak an awm a, Myanmar-a pianga seilian zingah pawh Mizorama péma inbêngbel ta tam tak an awm. Independent ram an nih ve ve hnuah pawh Mizote chu kan intlawhpawh tawn nasa a, pêm kual pawh tam tak an la awm zui zel a ni. Tunah ram hrana awm ni mah ila, hnam khat kan nih miau avangin intlawhpawh loh theih a ni lo.

FMR hlih a nih chuan Mizoram leh Myanmar-a Mizote zalen takin kan intlawhpawh a remchang tawh lo ang a, phalna lak a ngaih chuan harsatna tam tak a awm ngeiin a rinawm.

Ramri hung pawh hi Mizote tan chuan duh chi a ni lo. India-Bangladesh ramri hungah pawh Mizoram (India ram) eng emaw zat ramri hungna páwn lamah a awm a, India-Myanmar ramri pawh hung ni ta se, ram eng emaw zat chu ramri hungna pawnah a awm leh ngeiin a rinawm. Ram zím tê pawh a hlut avangin a uiawm hle dawn a, ramri hnaiha chengte'n eizawnna kawngah harsatna an tawh phah thei bawk.

FMR hlih leh India-Myanmar ramri hung tumte tlawmngai pawlte leh Mizoram sorkar hotute'n an duh loa an dodal hi tih âwm tak a ni a; mipui pawhin a nihna tak kan hriat chian a, hmalakna awm ang angte an thlâwp a ṭul ang. A ṭul ang zelin hma la zel se, na zawk pawha hmalakte pawh a la ngaiin a rinawm.

Chutih rualin, India sorkar thu a nih avangin Mizote duh dan ang ni loin, a kaltlangpui thei a ni tih erawh hriat tel a ṭha ang.