Gas home delivery chungchang

Food, Civil Supplies and Consumer Affairs Minister chuan February 22, 2024 khan Assembly budget session-a zawhna a chhannaah, Aizawl Municipal Corporation huam chhung leh district khawpui tinah eirawngbawlna gas home delivery kalpui vek a nih tawh thu a sawi a, chutih rualin, veng zawng zawngah kalpui a la nih loh thu a sawi tel bawk.

Sorkar thupek angin Mizoram district khawpuiah chuan eirawngbawlna gas sem leh lak danah home delivery vek ngei ngei tur a ni a, mahse, veng tam takin an kalpui mek laiin, veng eng emaw zatah chuan kalpui a la ni lo. Aizawlah chuan home delivery la kalpui lo zingah veng hlun leh changkang anga mipuiin an ngaihte pawh an tel nual niin a lang.

Gas home delivery hi Aizawl leh district headquarters-ahte chuan kalpui ngei ngei tawh tur a ni a, sorkar thupek a ni. Home delivery la kalpui lohna vengah hian a veng mipuite emaw, gas agency/distributor emawten chhuanlam an nei ngei ang a; mahse, an chhuanlam chu chhuanlam tling a ni ang em, tih erawh ngaihtuah tham a ni.

Chhuanlam hi siam dawn chuan phuahchawp mai tur hi a awm zel a; chhuanlam chu chhuanlam tling a ni em, tih erawh ngaihtuah tel ngai a ni. Gas home delivery la kalpui lohna vengahte hian an la kalpui loh chhan a inang lo mai thei a; veng ṭhenkhatah chuan veng mipuite vang a nih theih rualin, hmun ṭhenkhatah chuan gas agency-te vang a ni thei bawk.

Aizawl leh district khawpuia gas home delivery kalpui ngei hi sorkar thupek, mipui tan pawha ṭha tur a nih avangin kalpui ngei tur a ni a, tihmâkmawh a ni. Gas agency-te'n mawhphurhna sang tak an nei a, sorkar thupek tipuitling turin chak takin hma an la tur a ni a, veng/khawtlang hruaitute pawh sawipuiin an nawr a ngai ang.

Veng/khawtlang hruaitute leh mipui pawhin gas home delivery kalpui dan kawng an zawn a ngai ve bawk ang. Veng dang pawhin an tih theih reng, hun rei tak chhung nuamsa taka mipuiin gas an lak theih tawh lai a, tun thlenga a ti thei lo bik nihte hi a tlàwmthlak a, a zahthlak tel bawk tihte hre tel ila; kan veng ṭheuhah gas home delivery kalpui a nih theih nan rilru sénga ṭan lak tlàn hi kan tih tur a ni.