NIT Mizoram tihpuitlin

Higher & Technical Education Minister Dr Vanlalthlana chuan, National Institute of Technology, Mizoram campus, Lengpui rama buatsaih mekah sum tam tak sèn a nih tawh laiin hnathawh a la tlem thu te, EFCC department-in cheng vbc. 22 chuang pek an phût thu te, NIT chu sorkar laipuiin Mizoram aṭanga lak chhuah mai a duh rum rum tawh thute February 23, 2024 khan Assembly House-ah a sawi.

NIT Mizoram hi VNIT, Nagpur hnuaiah kum 2010 khan ṭan niin, zirna pawh ṭan a ni a, kum 2011-ah VNIT, Nagpur hnuai aṭangin a hranpain a awm zui. Kum 11 chuang kal ta, October 13, 2012 khan khatih laia HRD minister Kapil Sibal chuan, Lengpuia NIT Mizoram campus nghet tur lungphùm a phúm a, mahse, tun thlengin tihpuitlin a la ni ta lo a, hna thawh tawh chin pawh a la tam lo hle.

NIT Mizoram campus a puitlin har chhan hi sum a awm loh vang niin a lang lo a, chhuanlama sawi rîk ber chu forest clearance awm loh thu a ni. Forest clearance pawh chu kum 10 chuang chhungin tihfel a ni ta chuang lo a, mawhphurtu nia lang state sorkarin a bawhzui chak loh vang leh, a tak taka hmalakna a awm tâwk loh vang a ni mai ang em?

NIT hi India rama zirna ṭha bik, premier institution an tih zinga mi a ni a, Mizorama din ve a ni hi a lawmawm hle. Campus nghet tur tihpuitlin a ni hlei thei lo erawh a pawi hle thung. Campus nghet chungchanga harsatna chinfel thuai a nih loh a, sorkar laipuiin a la chhuak a nih phei chuan a a uiawm tak zet dawn a, a mualphothlak hle bawk ang.

NIT Mizoram hi a nih tur ang tak a nih thuai theih nan leh Lengpuia campus pawh tihpuitlin thuai a nih theih nan, mawhphurtu zawng zawngin nasa lehzualin ṭan la se. Mizoram sorkar pawhin a tih tur chinte hmaih awm loin chak zawkin bawhzui rawh se.