Mahni hmuna ṭha taka awm leh thawh

Excise & Narcotics department (END) minister Lalnghinglova Hmar chuan February 24, 2024-a Kolasib-a END office a tlawhnaah, END-a thawkte sawn kual chungchangah END Manual anga kal a nih tur thu te, sorkar hnathawk tan awm duhna bik leh awm duh lohna bik neih a rem loh thu te, END-a thawktu indaih lohna tiziaawm turin sorkarin hma a lak mek thute a sawi.

Sorkar hnathawkte hi an awmna hmun, an thawhna hmun sawn theih a ni a, sawn kual pawh an ni ṭhin. Hei hi anmahni sorkar thawkte pawhin an hrechiang em em. Awm duhna leh awm châkna bik neih te, awm châk lohna bik neihte hi thil àwm lo a ni lo a, thil nih phung pakhat a ni. Chuti chung chuan, sorkarin, hotute'n awm tura an tihna hmun apianga phûr tak leh ṭha taka awm zel theih erawh sorkar hnathawkte tih ngei tur, an awm dan tur a ni.

END-in dan leh kal phung a neih ang taka thawktute sawn kual a, an awmna tur ruat a ni tur hi a lawmawm a, tihlawhtling ngei se. Aizawl hi hmunpui, thawh tur pawh tamna ber, thawktu pawh mamawh tamna hmun a nih avangin an buk lo thei lo a; chutih rualin, district lamte pawh ngaihthah loh ni se, khairual thei ang berin thawktu sem rual ni thei se a duhawm hle.

Tun hma aṭang tawhin END-ah hian thawktu indaih lohna sawi a ni reng a, zu khap a nih phei chuan hna a tam sawt a, an indaih lo zual ṭhin. Tunlaiah heroin a hluar em em a, man tur a awm deuh reng a, hei vang hian END hian hna an ngah zual em em bawk.

END-a post ruak zawng zawng hnawhkhah nghal duak theih a ni lo ang a, chutih karah chuan ruihhlo hluar zel chak zawk leh hneh zawka do a nih theih nan END-a thawktute an indaih lehzual theih a ngai a; thawktu a tam thei ang ber sorkarin lak belh a tum hi tihlawhtling thuai se a ṭha ngawt ang le.