Danin a phal chin bâka chêtna tihtawp

Home Minister chuan February 26, 2024 khan Assembly session-ah, police officer zingah danin a phal chin bâk mihring (police) leh lirthei kawl an awm tawh loh thu leh, police officer pension tawh zingah sorkar lirthei leh mihring (police) kawl an awm tawh loh thu a sawi.

Tun hma aṭang tawhin police officer zingah mahni in lama danin an phal chin aia tam mihring (police) leh, lirthei kawl an awm ṭhin tih sawi a awm fo. Mimal in saknaa police tam tak chhawr an awm ṭhin thu te, mimal thil leh in sakna bungrua phurhna atana police (sorkar) lirthei hmang an awm ṭhin thute sawi a ni ṭhin a, a zia lo hle. Police officer pension tawh zingah pawh sorkar lirthei la kawl zui duh tlat te, mahni in lama mimal thil pawimawh thawk tura police mi leh sa la kawl zui zel duh tlatte an awm ṭhin bawk a; hei phei hi a zia loin a mawi lo tak zet a, hnam rinawma sawi ṭhin Mizo Kristiante tih atan chuan thil zahthlak tak a ni.

Danin a phal chin bâk, danin a phal chin aia tam lirthei leh mahni in lama mihring (police) kawla inchhawr hi dan bawhchhiatna a ni a, dik taka dan kengkawhtu hotu lute'n an ti duh hi thil dik lo, thil zahthlak a ni a; dan bawhchhiatna a nih mai bakah, mihring mihrinna aṭang pawhin thil dik lo a ni.

Police officer thawk mekte leh pension tawhte'n danin a phalsak chin aia tam an in lama police an kawl (awmpui) leh sorkar lirthei an kawlte la let tura sorkarin hma a la hi a lawmawm tak zet a; police hotute pawhin thu awih taka sorkar duh dan anga an kawl theih chin bâkte department (sorkar)-a an dah lêt pawh a lawmawm lehzual.

Tun hnu zelah pawh danin a phal chin bâka police leh sorkar lirthei kawl an awm tawh loh nan, Mizoram sorkar hi ṭang mar pát zel se. Police officer-te pawhin danin a phal loh a nih mai bakah, mihring mihrinna leh Kristianna leh rawngbawltu nihna aṭang pawhin thil dik lo a ni tih hre rengin, an phû (entitle) chin bak chu kawl tum tawh lo se a ṭha hle ang.