Mizoram budget–dik taka sum hman

Finance enkawltu Chief Minister chuan kum 2024-25 Mizoram budget estimate cheng vbc. 14,412.12 chu February 27, 2024 khan Assembly budget session-ah a pharh ta a; 2023-24 budget estimate aiin cheng vbc. 202.17 (1.42%)-in a tam zawk.

Kum 2024-25 budget estimate cheng vbc. 14,412.12 zinga vbc. 11,957.04 chu hmanna tur awmsa – revenue expenditure niin, sorkar hnathawk leh pension hlawh, sorkar inrelbawlna, leiba rulhna leh ṭul danga hman tur a ni a, budget aṭangin 82.97% lai a tling. Hmasawnna hna thawhna tur (capital expenditure) chu cheng vbc. 2,454.08 niin, budget pum pui aṭangin 17.03% chauh a ni. Budget thara capital expenditure 17.03% chauh a ni hi Mizoram state a nih hnuah capital expenditure a hniam ber ṭum a ni hial mai thei a, kum hmasa 2023-24 ah chuan vbc. 3,141.19 (21.90%) niin, budget tharah hian cheng vbc. 696.11 velin a tlem zawk a ni.

Sorkar hnathawkte leh pension-te hlawh atana sum sen hi a pung zel lo thei lo a, chuvang chuan revenue expenditure hi a pun ve hret hret zel a ngai àwm e. Chutih rualin, revenue expenditure a san lutuk loh nan sorkar inrelbâwlna atana sum sen leh, thil dang atana sum sen titlem tura ṭan lak zel erawh a ṭul ang.

Kum hmasa aia kum thara hmasawnna hna thawhna tur capital expenditure cheng vbc. 696.11 vel laia a tlem hian, eng nge a nghawng dawn sawi mai a harsa rih a; a lan dan maiah chuan hmasawnna tura hna thawh a tlem phah ngei tura ngaih a ni.

Budget tharah hian capital expenditure cheng vbc. 2,455.08 lai a la tling a, budget-a lang lo, project leh thil dang hmanga sorkar laipui aṭanga sum hâi luh belhte pawh a la awm nualin a rinawm. A pawimawh ber chu – sum awm ang ang leh neih ang angte eirukna tel loa dik tak leh ṭha taka hman a ni a, chutiang tur chuan sorkar pawhin ṭan la se. Sum awm ang angte eirukna tel loa dik leh ṭha taka hman a nih phawt chuan ramin hma a sawn theih tho a beiseiawm.