State pawna hnathawh

Mizoram police-te chuan Mizo hmeichhe naupang pahnih, New Delhi-a hna thawk tur anga hruai thlatua puh hmeichhe pahnih chu New Delhi-ah an man a, Aizawl Police Station an hruai thleng.

Police thuchhuah chuan, tunlai hian spa, massage parlour leh beauty parlour-a hna thawh beisei vanga phai lam pan an awm nuala a lan thu tarlangin, "Hna dik leh felfai tam tak karah thil dik lo thleng thei a awm fo avangin, mipuite fimkhur lehzual turin kan inchah a, an duh vâng reng pawh ni se, naupang kumtlinglo, an nu leh pate emaw, chhungte remtihna loa hruai hran hi danin a phal loh leh case neih theihna a ni," an ti.

Tun hnaiah Mizoramah hna a tam loh avangin state pawna hnathawk tura intirh chhuah kan intihhmuh a, hmasawnna lawmawm tak a ni. Kan ramah sorkar hna chiah hna anga kan ngaih avangin mi tam takin sorkar hna an hmuh loh chuan hna hmu loah an inngai mai ṭhin a; nimahsela Mizoramah leh ram pawnah pawh mahni inchawm theihna tur hna tam tak a awm a, chutiang thawk ngam leh thawk hreh lo Mizo ṭhalai an chhuak zel.

State pawna hnathawh kan intihhmuh rual hian, kan hnathawh tur kan hriat chian hmasak a pawimawh hle. Tun hnaiah mahni hnathawhna tur pawh hre chiang lo, hlawh ûma kal chhuak ve tawp mai an awm ṭhin a, hei vang hian mi ṭhenkhat chu an tum loh lamah an kal a, an thawh duh loh hna thlengin an thawh phah niin a lang.

Hnathawh hreh loh avanga hna hre chiang loa chhuah mai te, a tirtu lam an rintlak leh rintlak loh lam ngaihtuah loa chhuah ve tawp te hi thil tihchi a ni lo. Hemi kawngah hian kan inhrilhfiah chiana kan fimkhur a pawimawh takzet a, phaia hnathawka chhuah hi thil ṭha leh intihhmuh chi ni mah se, hnathawh tur hre chiang loa chhuah hi thil hlauhawm tak a ni tel tih hriat a ṭha awm e.