SASCI hnuaia hnathawh

Sorkar sum kum 2023-24 chhunga Mizoram sum hmuh chungchanga sawi lâr tak pakhat chu SASCI a ni a, ram (state) tana ro tling thil siamna tura sorkar laipuiin state-te sum a pûktirna scheme a ni. Chutih laiin, state sorkarin party worker-te duhsakna leh an tana hnathawh tur semna anga ngaih theih tur leh, election campaign fund atan hman a ni zui anga ngaih theih turin thil a kal chho a, scheme-in a tum tak a thelh chho ta deuh niin a lang.

SASCI chungchang hian February 29, 2024 khan Assembly budget session-ah sawi a hlawh viau. PWD Minister chuan kum 2023-24 chhunga sum hmuh tur vbc. 500 aṭangin vbc. 206 hmuh a nih tawh thu te, chutih laia sorkarin campaign fund ang deuha hman a nih thu te, hna siam danah ram tana ro tling dinna lam a hawi loh thu te, chutiang chu ni mah se, hna pek tawhte tihtawpsak tum a nih loh thute a sawi.

Mizorama buaithlak deuh mai chu – hmasawnna hna thawh, a bik takin hna lian thamte a hun taka zawh a ni ngai lo leh sum ruahman (estimate amount) a laklawha siam ṭhata tihpun a ni ṭhin hi a ni. Hei hi eirûkna leh hlemhlêtna kawngká a nia sawi a nih bakah, Mizoramin hma a sàwn chak loh chhan a ni fo. Mipui tawrhna thlentu a ni fo bawk. A pawi hle.

SASCI hnuaia hnathawhte pawh hi hna sem laia sorkar lai party-in campaign fund ang hiala hna semna leh party mite induhsakna atan an lo hmang a nih pawhin, hna hmutute'n an hna ṭheuhte dik tak leh rinawm taka a nihna tur ang taka an thawh hi a pawimawh lai a ni. Chutiang a nih theih nan chuan sorkar leh hna enkawltu department hotute pawhin hma la se, thawk ṭha lote chungah hremna lek hreh lo se a ṭha àwm e.

Mizoram hi state hausa ni lo mah se, sum awm ang angte dik taka hman a nih a, eirûkna tel loa hna thawh a nih phawt chuan tun ai hian ramin chak zawkin hma a sawn ngei ngeiin a rinawm. Hetiang rilru pú hian sorkar pawhin theihtawp chhuah se a duhawm hle.