Mizote leh hriselna

Khawvel hmun dangte rualin Mizoramah pawh World Health Day hman a ni a; sorkar damdawi-in hrang hrangah a thlawna zunthlum inentirna buatsaih a ni a, mi 452-in blood sugar sang an nei tih hmuhchhuah a ni.

Mizote hian hriselna ngaih pawi-mawh nachang kan hre lo rei hle a, a ṭhente chu an neihin a tlin loh vangte pawh a ni. Hnam hrisel lo tak ang maiin kan awm mek a, kan ei leh in leh zuk leh hmuama kan insum loh nghawng kan tuar mek a, a pawi hle a ni.

Zuk leh hmuam avanga kan tawrhna hi a nasa takzet a, zu leh ruihhlo vanga kan harsatna tawhte nen phei chuan chhut ila Mizote hi mahni natna insiamchawp vangin kan tuar nasa hle. Zuk leh hmuam hi hriselna atan a ṭhat lohzia hre reng chungin kan nghei hleithei lo a, chu chuan natna tam tak a thlen a, a inenkawlna sensoah kan inseng a, a ṭhen chuan kan thihpui hial a ni.

Mi neinung zawk zingah pawh insum loh vanga natna vei mi tam tak an awm tawh a, awm âwl si ei leh ina insum nachang hre si lote'n tun hnaiah natna tihdam harsa tak tak an vei mek. Kan ei turah chintawk kan hre lo ṭan a, hriselna chungchang ngaihtuah loin kan neih avangin kan ei ṭeuh ṭeuh a, kan chhiatpui mek a ni.

Ei leh in hrisel zawk leh chakna tam zawkte kan la nei zo lo a nih pawhin hriselna tichhe thei lamah hian insum thung ila, zuk leh hmuam leh ruihhlo bansan ila, kan natna insiamchawp tam tak hi chu pumpelh theih a ni ngei ang.