Khawpuiah retheihna ûmbo

Deputy chief minister Tawnluia chuan, kum 14 chauha upa UDPA department chu hmalakna ngah ber depart­ment zingah a tel pha tih a sawi a; Mizorama khawpui 23 tihhmasawn hna a thawh thu a sawi a. Faina lam te, tui in tur te, lirthei vanga khawpui tawt tihthawlna tur te, kea kalte himna turte a thawh thu a sawi bakah khawpui chhunga lirthei dahna hmun tam zawk buatsaih nan PAHOSS scheme-ah vaibelchhe 60 chuang dah a ni a ti a, khawpui area huam chhunga retheihna umbo turin nasa takin hma lak a ni, a ti. 

Mizoramah hian thingtlang mite retheihna thu hi kan sawi nasa a, hei hi thudik a ni a, chutih rualin khawpuia retheite retheihzia leh an dinhmun hi zir chian lehzual a ṭha khawp mai. Thingtlangah chuan mi pangngai chin tan chuan lo neia eizawn theih a ni a, sum leh paiah harsa deuh mah se mahni ei leh in tur tal thar chhuah theih a la ni. Khawpuia miharsa leh rahbi tleu laklawh tawh tan chuan thil hi a harsa em em a; thingtlang leh khawpuia miretheite khaikhin thu a awm lo a, chutih rualin khawpuia retheite (urban poor) dinhmun hi sorkarin a ngaihsak zual a ṭul khawp mai. 

Aizawl khawpui chuan enkawltu bik Aizawl Municipal Corporation (AMC) a nei a, AMC hian kum 10 chhung sum ṭhahnem tak nen Aizawl khawpui leh a chhunga chengte a enkawl a ni. AMC sum sen ral zat aṭangin miretheite ta tur engzat nge tel ve? AMC hi tute nge hlawkpui a, tute nge dinchhuah phah a, tute nge hausakpui tih hi ngun taka zir chian a ṭha hle. Khawpui enkawlna hna hi mihausa kawk (pro-rich) zawnga kalpui a nih chuan, khawpuia retheite hi an bet zual zel dawn a ni. 

Khawpui enkawltu department bik UDPA pawh hi sum a ngahin hna pawh a thawk nasa a, hnathawktute pawh an fakawm hle. Chutih rualin tun ai hian miretheite tan luang chhuak nasa zual se, mi hausa zawkte tana remchang tur thil an duang chhuak ang bawk hian mirethei hawi zawnga (pro-poor) thil kalpui uar deuh deuh se a ṭha ngawt ang. Khawpuia retheihna umbo tur hian building leh thil lian tham din thar zel hi a ṭangkai tawk lo thei a, miretheite thleng phaka sorkar a kûn hniam zel a ṭul takzet a ni.