Traffic police an khauh a ṭul

Traffic SP chuan thuchhuah siamin, theihtawp chhuaha fimkhur tura inzirtirna an kalpui chung pawha traffic dan bawhchhia man ngai an awm reng chu pawi an tih thu a tarlang a; dan bawhchhiate lakah khauh lehzual an tum thu a puang.

Lirthei chetsualna tam ber hi tlân chak lutuk leh traffic signal zawm ṭhat loh vang, rui chunga lirthei khalh vangte leh mobile phone hmang chunga lirthei khalh vangte a ni a; hei bakah hian bungraw phur chi lirtheiah phurh zawh tâwk aia rit phurh vang te, bungrua phur chi lirtheia mihring (passenger) phurh vangte pawh a ni tel bawk.

Mizoramah kawngpui a zau lo a, fimkhur taka khalh pawhin vanduai vanga chet sual theihna a tam a, chutihlaia fimkhur loh vangte leh inthlahdah vang liau liaua chetsualna a thleng ṭhin hi chu a pawi khawp mai. Midangte fimkhur loh vang, an ruih vang leh inthlahdah vanga thiam lohna nei ve si loin vanduaina an tawk ṭhinte hi a demawm takzet a ni.

Heng chetsualnate hi pum-pelh vek theih ni lo mah se, hnathawktu lamin khauh zawka dan an kenkawh chuan chetsualna ṭhenkhat hi chu a ven theih ang. Rui chunga lirthei khalhte hi tun aia uluk leh zing zawk hian ennawn ṭhin se, sorkarin a cho a, zu a zuar ngam tawh a, zu ruiin lirthei an khalh nge khalh lo tih endik hi chu a bata a bat a ni; Traffic lam chang ni loin Excise leh Police lam pawhin an pui ṭha tur a ni ang.

A bikin khawpuiah traffic police-te hi tun aia an khauh zual a ngai a, hna ṭha tak an thawh mek hi chhunzawm se, inpekna leh ruahmanna thar nen, lirthei chetsualna veng tur leh, dan bawhchhiate vil turin ṭan la thar rawh se.