Raltlan leh dan bawhchhiatna

Mizoram Chief Minister chuan Zo hnahthlak, sahimna zawnga Mizorama awm mekte chu khawvel huap pawha ram ralmuang Mizoramah an lut tih hre turin a chah a; Mizorama ralmuang taka an awm theihna bul – khawtlang leh ram dante zâwm ṭha tura chahin, dan an bawhchhiat chuan dan hmaah ngaihhnathiam an nih dawn loh thute a sawi.

Kan ṭhenawm ram leh state-ah tualchhung buaina a awm a, loh theih lohin mipuite'n an sahim nan an in leh lo leh an ram an chhuahsan a ngai a, ṭhenawm ram an pan (an raltlan) a ṭul ṭhin. Tunah hian Zo hnahthlak mi sing tél chu Mizoram, ram ralmuang takah an rawn lut a, ram mipui aṭangin dodalna awm miah loin lo dawnsawn an ni a, lo tuamhlâwm an ni. Sorkar, kohhran, pawl hrang hrang leh mimal tam takin anmahni chhawmdâwlna tur an thawhkhawm ruih ruih a nih hi.

Ram tinah, khaw tinah, hnam tinah hian mi ṭha leh fel tam tak an awm rualin, mi ṭha lo, mi sual, pawi khawih hreh lo leh dan bawhchhia an awm vek mai. Dan bawhchhiate leh pawi khawihtute chu khua leh tui an ni emaw, mikhual an ni emaw, raltlan an ni emaw, an chungah dan ang taka hremna lekkawh zel a ṭul. Dan lalna ram hi ram nuam a ni zel. Chief Minister-in a sawi angin, raltlante zingah ram dan bawhchhiaa pawi khawih an awm a nih chuan khawngaihna lantir bik tur a ni lo a, dan anga an laka hremna lek pawh tihmâkmawh a ni.

Pawi khawihna rau rauah, khua leh tui pangngai ni lote'n pawi an khawih hian mi huat an hlawh zual ṭhin a, mi thîkthu a chhe zual ṭhin tihte pawh hriat a ṭha. Zo hnahthlak raltlante pawh an fimkhur lehzual a, induhsakna hi inhuatnaa a chan loh nan, inunauna hi a chhiat loh nan Mizoram leh India ram dante an zawm ṭhat a ngai a; pawi khawih lo tura an inven a, an inzirtir a, an infuih sauh sauh a ṭul àwm e.

Mizoram mipuiin duhsak tak leh hmangaihna nen an lo dawnsawn a, an lo tuamhlâwm a, ṭanpuina tam tak an thawhkhawm a, an insenso nasatzia hi raltlante hian an hre reng tur a ni a; inṭanpui lêt a ṭul hun a awm a nih pawhin a ṭul dan ang anga inpuih let pawh tih àwm tak a ni ang.